(28) 5141? Takongkang Juo Akong Ko Mah

Sajak diajak Udin jo Amir bagabuang jo PT Guci. Tahun ka tahun, hiduik Iben mulai barubah. Hubuangannyo jo bini mulai mambaiak sairiang jo mambaiaknyo kondisi ekonomi rumah tango. Namun, bak ujuang sabuah kisah, ado elok ado buruak. Eloknyo sarupo nan di ateh, buruaknyo, Iben mulai baliak tajun ka dunia togel.

Siang ko, Iben sibuk di barando mambaliak-baliak buku sarupo anak sakolah nan sadang baraja sabalun ujian. Mandanga ado bunyi klatak-klutuk mandakek, Iben langsuang manyuruakan buku nantun.

“Eh, mama. Gaya bana mah, ka balanjo?” sapo Iben sok santai walau indak bisa manyuruakan muko nan pasi dek takuik katahuan.

“Iyo. Papa di rumah se yo. Awas kama-kama” baleh bini Iben mangancam jo “gaya” nan aneh.

“Hehehe, ka kama pulo Papa” baleh Iben pura-pura berang jo “gaya” nan sarupo.

Baitu bininyo mangaluakan oto dari garasi, Iben langsuang maambiak kunci Honda nan talatak di meja TV. Nyo gas Honda tu langsuang manuju markas, tampek inyo jo para togelers mania bakumpua.

“Hoi Ben, kama se?” sambuik Ombak jo Badai, dari dalam kadai baitu Iben tibo.

Kunun, kaduo urang ko adolah induak angkang angko di kota Padang. Ombak adolah tukang rekap nomor. Saluruh nomor nan kalua samanjak jaman Porkas, SDSB hinggo jaman togel kini, salasai dibukukan dek Ombak ko. Jadi, ombak ko adolah databes togel nan bajalan. Samintaro itu, Badai adolah tukang buek syair jo ahli nujum. Sagalo mimpi hinggo ka info-info alam, jaleh angkonyo dek baliau ko, tamasuak jo angko-angko mistiknyo.

Baitu sampai, Iben langsuang duduak di muko duo kawannyo ko.

“Om, wakden ado angko padek ha”

“Bara?”.

“5141”.

“Dari ma dapek angko ko Ben?”

Badai nan ahli info alam langsuang manyorong manyalidik.

“Iko ko, BA oto jiran subalah rumah den” jawek Iben baduto. Nan sabananyo, BA otonyo surang nan sabanta ko dibaok bininyo pai balanjo.

“Mukasuik den, baa kok sampai BA oto ko waang kecek-an angko padek? apo alasannyo?” lanjuik Badai mampajaleh tanyonyo.

“Iyo pulo tu” salo Ombak sato maningkahi.

Sabalun mamulai bacarito, Udin manyalai rokoknyo nan lah tapuntuang. Lalu, mancaliak lakek-lakek ka muko duo togelers ko.

“Baiko Om ha, Dai. Tigo hari nan lalu, jiran den ko dicakak-i bininyo. Bininyo mangamuak dek gara-gara inyo lupo manjapuik oto ko ka bengke”

“Ee yayai, cakak laki-bini tu wajar se nyo mah. Ndak info do tu” potong Ombak mamatah carito Iben.

“Danga dulu Om, wakden kan alun salasai lai” kilah Iben indak sanang caritonyo dipotong tagak.

“Taruihlah, sampai-sampaian dulu caritonyo”

Badai bukak suaro mahambek Ombak nan nampak nio baradu kalorok baliak.

Mandanga iko, Ibenpun malanjuikan caritonyo.

“Jadi, nan malam ka patang, bamimpi baliak nan bini ko. Dalam mimpinyo, inyo mancaliak lakinyo pai bajalan-jalan mambao cewek jo oto ko”

“Oooohhh, jadi itu infonyo?” sambuik Ombak jo Badai sarantak.

“Kalauo itu, memang info paten mah Ben” lanjuik Badai sambia maangguak-angguak balam sarupo urang bapikia. Mancaliak iko, Iben langsuang mamasuakan galehnyo.

“Aa juo lai Dai, kan lah jaleh tu, kito hajar se 5141 ko”

“Yo tu. Jan lupo pulo manjago nan duo angkonyo”

Ombak maingek-an sambia manulihkan angko-angko tu jo nilai pasangannyo di ateh karateh.

“Om, Ben, tunggu sabanta”

Tibo-tibo Badai maambek niaik Ombak jo Iben nan main hajar baitu sajo.

“Aa juo lai Dai?” kecek urang-urang ko sarantak.

“Ka bapasang langsuang se. Ndak ka manunggu info Ampang Limo bagai dulu ko? Nak ado bahan pambandiang stek”

Mandanga namo nan baru ko, kaduonyo langsuang saliang caliak. Lalu, mamparatian jam tangan masiang-masiang. Karano wakatu mamasang masih lamo, Ombak sugiro bukak suaro.

“Ancak juo tu. Namun, sambia manunggu baliau, ancak kito olah juo angko-angko ko dulu”

Kutiko katigo togelers ko sibuk maolah-olah angko, dari jauah nampaklah urang gaek bajalan maegok-egok. Itulah Ampang Limo, suhu Badai, urang nan santiang mambuek syair, arih mambaco info alam. Di sampiang itu, baliau ko tapakai juo sabagai pawang lauik, sarato kaamanan di hotel “Rancak Bana (RB)”. Hotel tanamo di kota Padang nan posisinyo ndak jauh bana dari markas togelers ko.

Baitu sampai di tujuan, gaek ko lah langsuang bakuai.

“Hoi, nak rang! lai aman?”

“Aman. Duduak lah dulu suhu” jawek katigonyo sarantak.

“Wakden ndak ka duduak do, den sadang dinas. Ko kamari dek ado info padek se nyo mah, dek ibo mancaliak nak urang tiok sanjo kanai lakak taruih dek si Akong” tarang Ampang Limo baciloteh di salo angoknyo nan tarangah-rangah.

“Apo infonyo tu Suhu?, jalehanlah, nak kami simak basamo-samo ha” sambuik Iben capek mamotong ciloteh Ampang Limo.

“Tadi, ado oto nan parkir di hotel, sangko wakden tamu hotel juo. Jadi den padiaan sajo. Lah 15 minik balalu, indak ado juo urang nan kalua, wakden tantu curiga. Den dakeki lah oto tu jo kawan-kawan kaamanan lainnyo lambek-lambek, hahahaha…”

Tibo-tibo, Ampang Limo langsuang tagalak takekek-kekeh sabalun manyalasaian caritonyo.

“Bato Om, lanjuikan lah dulu. Basamo-samo kito galak beko” salo Iben nanpak indak saba manunggu.

“Jadih. Baitu sampai dakek oto, den cubo mancaliak dari kaco balakang. Ruponyo, hahahaha. Ado pasangan selingkuh nan sadang indehoi di dalamnyo. Mancaliak tu, langsuang den sentak pintu oto tu. Baitu pintu tabukak, dek takajuik, urang ko langsuang lari kaduonyo, lupo baraso badan ndak basarawa, hahahha”

Mandangan info lari ndak basarawa ko, galak pareman-pareman ko langsuang manyambua indak dapek dilarai.

“Hahaha, jadi dapek rasaki Suhu yo. Patuik lah sanang bana galak nampak dek Den” ambok Iben maningkahi mambuek nan lain tambah galak manjadi-jadi

Dek ndak ado tando-tando galak ko ka habih, Ombak nanpak bausaho mandiamkan sambia mamacik paruiknyo surang nan sabananyo lah sakik manahan galak.

“Alah galak mah, serius lai! Bara BA oto tu Om?” tanyo Ombak mambuek nan lain sugiro manahan galaknyo.

“Iyo Om, bara BA nyo?” sambuang Badai jo Iben sarantak.

“Tanang! lah den catat kok. Iko ha, 5141” jawek Ampang Limo sambia mangaluakan timah rokok batulih dari dalam saku-sakunyo.

“5141?” Iben maulang jo muko pucek. Samintaro togelers lainnyo langsuang malonjak-lonjak kagirangan.

“Hahaha, sah takongkang si Akong kini ko mah. Info samo objeknyo samo. Yo pambawo rasaki bana jiran Iben ko kironyo, hahaha” sambuik Badai sambai mangguncang-guncang bahu Iben nan nampak agak “taguncang”.