(41) Pareman Lah Apak Den Lai

Malam ko sambia mangopi, Amir, Iben, Udin banostalgila. Kalau biasonyo urang banostalgia tantangan dirinyo. Kok baliau-baliau ko justru tantang Apak-Apaknyo. Nan dicaritoan lain pulo, indak tantang jaso-jasonyo, tapi malah tantang doso-dosonyo.

"Manyasa bana den dulu malawan ka Apak" curhat Amir mamulai carito mambuek duo kawannyo ko takajuik.

Amir talok malawan ka Apaknyo? Mustahil, susah bana untuak bisa dipicayo. Karano itu, Udin langsuang manyalidik mancari tahu.

"Bilo ang malawan ka baliau?" tanyo Udin sambia manyalai rokoknyo.

"Dulu, untuang baliau haniang se" lanjuik Amir sambia manarawang.

"Untuang baa lo ko Mir. Kalau malawan tu ndak tau jo untuang namonyo mah" potong Iben manyorong maingaikkan.

"Baa ka indak, tanyato baliau ko dulu karajo di terminal, pareman gadang nan trkenal buruak tangan ko ha. Manuruik si pecok agen APB, muncuangnyo nan pecok tu buah tangan Apak den tu mah, ndak pareman Apak den dek ang tu?" ciloteh Amir panjang leba mampalanggak-an gaeknyo.

Mandanga iko, kabanggaan Iben ka dinastinyopun jadi tarusik. Maso pulo Cuma pareman terminal bapalanggakan, alun manga-manga jo Apak den lai ko. Yo lah buto si Amir ko mah, pikia Iben kutiko itu.

Karano itu pulo, Iben baniaik nak mambukak mato Amir ko. Caronyo, tantu digalakan dulu caritonyo nan sabanta ko.

"Hahaha, alun lai, indk manga-manga do tu, pareman Apak den lai" kecek Iben mancime-eh sambia galak senggeang.

"Aa pulo kehebatan Apak ang tu, bajalan se lah ndak luruih do" baleh Amir langsuang paneh.

Indak ado nan buliah mancimeehan Apak den, gumamnyo dalam hati. Namun, karano gilirannyo alah sudah, inyo indak jadi malanjuikan.

"Eits, jan salah ang Mir. Samaso ijok di kampuang dulu, Apak den tu gerilyawan mah, sarupo Rambo film Amerika tu ha" lanjuik Amir mangamukokan alasan kato-katonyo di muko.

“Wuihhh” respon Udin jo Amir tangango satangah indak picayo.

Tarago kaduo konconyo ko tangango, Iben langsuang basijadi manyambuang carito.

“Karano itu, baliau ko jadi buron nan paliang dicari dek Ulando maso itu”

"Emangnyo, apo nan dipabuek Apak Rambo ang tu?" tanyo Amir lapeh baitu sajo.

"Bayangan dek ang yo. Dek bagak Apak den tu, dalam saminggu, 4 sampai 7 urang tentara Ulando baliau kuduangan. Baa ndak ka tabik suga urang-urang tu" urai Iben malanjuikan.

"Ohhhh" Amir langsuang maangguak-angguak takjub.

Batulak balakang bana jo Amir nan maangguak-angguak dek takjub, Udin malah galak senggeang takah mamanciang emosi lawan.

"Masih bangga dengan dosa-dosa, alun pareman lai do. Indak manga-manga jo Apak den do tu" salo Udin tibo-tibo manyalo sarupo urang nan sadang  mangecek ka diri surang.

“hadeh” dado Amir jo Iben raso disintak“.

“Apak den tu dulu pasukan khusus” lanjuik Udin manambahkan.

“Nan ka bana se lah?”tanyo Amir sambia malulua liuanyo.

"Tau kalian ndak? Maso timbakau jendral Dekok dulu manjadi, dalam samalam, rato-rato 10 nyawa malayang di tangan baliau"

"Astaga, berarti baliau ko pasukan penyapu ko?" salo Iben jo Amir serius.

“Penyapu aa lo ko, pembunuh yo” jawek Udin saketek emosi.

“Iyo itu mukasuik kami”

“Sangaik batua”

“Tapi, danga-danga baliau dulu di kampuang se nyo, emang di ma markasnyo? sapo tau konco jo apak den” kebanggaan ka dinasti 45 Iben mulai tapanciang.

Mandanga ko, Udin langsuang mamiciak kaniang sarupo urang nan sadang bapikia kareh, mancubo maingek-ingek. Satangah bagulambek, akhianyo kalua juo suaronyo.

"Rumah panjang dakek pasa bawah"

“Nan ma ko?jauah dari rumah potong tu?”Amir batanyo sambia mangana-ngana bangunan-bangunan nan ado di daerah tu.

“Aha, itu nan gak ragu den ha, nan ma ko lah yo?” jawek Udin sambia mamasang wajah tanpa dosa.

“Ei, cimporong hanguih yo”