(24) Kopi Luwak

Tapatah dek galeh nan nyo bao dipaolok-olokan urang di surau ka patang. Iben mulai puta haluan mancari sasaran baru. Kini, Iben nanpak duduak di sampiang Mak Ponde nan sadang mangalai-ngalai malapehan panek sasudah mambarasiahan ladang kopinyo. Ndak dapek ikan gadang, bada tali-tali ko buliah juo. Baitu pikirannyo kutiko mandakeki Mak Ponde.

"Mak, pado paniang-paniang bana dek ladang ngenek ko, babisnis padek kito baa nyo Mak?" gosok Iben mamasuakan galehnyo. Sabaik, kalau baurusan jo Mak Ponde ko harus tu de poin. Kok indak, batele-tele kasudahannyo. Makonyo, Iben langsuang mangamukokan kato-kato bisnis di muko, bia nak tagak antene gaek ko, pikia Iben.

Sasuai jo kandak Iben, tanyato panciangannyo ko langsuang manganai.

"Mukasuik panakan?" jawek Mak Ponde duduak sambia mangaruikan kaniangnyo.

Mancaliak caro Mak Ponde batanyo ko,  samangaik pakang Iben jadi batambah. Lai ka manyangkuik umpan ko mah, gumam Iben dalam hati. Barikuiknyo, co bintang iklan di TV-TV, Iben langsuang basijadi.

"Yes, masuak barang ko" lonjak Iben sakutiko mambuek hati Mak Ponde jadi manggamang.

"Ahhhhh, iko ka mangarajoan wakden pulo waang mah, ndak bisa do" sapo Mak Ponde mulai mancium nan indak-indak.

"Batanang Mak, ka mungkin pulo Mamak ka Panakan pagarahan. Nan kini ko sabana tulus mah Mak, samato dek Ibo mancaliak Mamak dipagarahan si Kajuik Lore jo Jilatang se nyo ko" lanjuik Iben mayakinkan Mak Ponde sambia babaliak duduak ka tampek samulo.

"Capeklah kok iyo" semba Mak Ponde antaro maleh jo nafasu ingin tahu.

Mancaliak reaksi nan iko, Iben langsuang mangatur strategi bagulambek untuak manduduakan curito. Maklum, nan ka di lobi urang gaek, tantu harus bagulambek mainnyo, alon-alon kecek si "lelek", hehehe.

“Cak iko Mak. Mamak pernah mandanga curito tantangan kopi Luwak?” tanyo Iben sarupo negosiator nan santiang bana.

“Alun, kopi apo pulo tu?” jawek Mak Ponde sarupo urang nan bana-bana indak tahu.

Sabananyo Mak Ponde ko tau, karano baliau ko kan pacandu kopi. Tantu jaleh dek baliau tantangan sagalo kopi barikuik pakambangannyo. Namun, dek tabaco ado mukasuik lain di balakang carito Iben ko, baliau nak mancubo bamain agak salayok.

Samintaro itu, dek antene nan randah juo, Iben nanpaknyo indak manangkok. Inyopun lanjuik bacarito maolah si Mamak. Tukang panciang dihelo ikanpun dimulai.

“Kopi luwak tu kopi nan diolah dari hasia pambuangan luwak. Sabana syahdu rasonyo Mak, haragonyo maha pulo lai”.

“Dari cirik luwak ?” potong Mak Ponde capek sarupo urang nan basumangaik bana.

“Tapek bana Mak hehehe” sambuik Iben jo galak takekeh dek sanang maraso mandapek paratian.

Samintaro itu, Mak Ponde nanpak mancaliak Iben lakek-lakek sarupo urang nan tangah bausaho mancari kayakinan jo manimang-nimang. Sasudah diam sajanak, baliau akhianyo mulai maangguak-angguak surang sarupo urang nan baru mandapek ilham.

“ohhh, mantun"

Lalu, Mak Pondepun babaliak madok ka arah Iben.

"Lalu, apo kiro-kiro hubungannyo jo parak wakden ko?”

“Baiko Mak, pado payah-payah bana Mamak mahabehan ladang kopi sagadang kakuih ko, kito bisnisan baa nyo?”

“Bisnis apo?” tanyo Mak Ponde balagak tele.

“Bisnis karambia, yo kopi luwak tadi lah Mak” baleh Iben mulai galigaman.

“Hehehe, bato emosi panakan, tanangan batin tu. Cubo lah tuo bisuak, kok ndak randah pulo antene tu. Tapi, intinyo bisnis kopi cirik Luwak tu kan?”

“Tasarah Mamak lah eh, kok apo ka namonyo" baleh Iben capek.

"Baa caronyo?” lanjuik Mak Ponde manyalidik.

“Caronyo coiko Mak, kongsi gendong kito”

“Ha? apo pulo tu?” panciang Mak Ponde manggali labiah dalam.

“Giko Mak, Mamak kan lah tuo, punyo modal, punyo lahan. Samintaro wakden, masih mudo, tulang masih tageh, tapi indak bamodal dan indak balahan” lanjuik Iben manggantuang sambia mamasang jarek.

Mandanga uraian baujuang ko, Mak Ponde langsuang maangguak-angguak.

“Jadi, wakden ang suruah mamodali bisnis tu?” tanyo baliau sasudah angguak nan tarakhir.

“Tapek bana Mak” sambuik Iben sambia maacuangan jari ampunyo.

Mancaliak Iben nan makin manjadi maolah inyo. Mak Pondepun taniak nak mamandian Iben kuyuik-kuyuik. Ndak tangguang-tangguang sarupo nan dibuek urang di surau kapatang. Sabaik, Manuruik Mak Ponde, harusnyo nan lah pernah marantau sarupo Iben ko lah nan ka maaja rang kampuang ka arah nan labiah baiak. Bukannyo maolah, apolai mambodohi sarupo nan dilakukan Iben kini ko.

Iben ko panakan awak. Kok ndak awak nan ka maaja, siapo pulo lai. Bapikia sarupo iko, Mak Pondepun mulai mancaliakan mantaginyo.

“Jadihlah Ben. Lah paham den jo mukasuik carito ang di muko mah. Saketek nan manggamang, nan tulang kuaiak ang tu dipangaan? ka dicancang untuak makan malam Luwak tu?”

Dek indak manangkok poin tanyo Mamaknyo ko. Iben langsuang tagalak.

“Hahaha, tantu indak lah Mak, ibo lah jo panakan, babini alun lai”

“Iyo lo yeh. Tapi, nan tugeh waang apo?” lanjuik Mak Ponde maloro tapi sabananyo mangganjua.

“Tanang Mak, usah emosi, panakan Mak ko professional mah”

“Iyo, apo tugeh ang?” ulang Mak Ponde jo suaro nan agak kareh. Nanpaknyo, mulai tapanciang juo paneh baliau mahadoki pongah Iben ko.

“Giko Mak, wakden kan nan punyo ide. Jadi, seluruhnyo lah di dalam kapalo den mah. Pendeknyo, wakden sulap ladang Mamak ko jadi kandang, wakden isi jo luwak banyak-banyak, wakden monopoli sagalo kopi di pasa Sanayan. Mamak tingga basiwua-siwua se di siko nyo. Baa gak hati?" jaleh Udin maurai panjang leba.

“Ohhh mantun. Jadi, wak-ang maajak wak-den bataranak Luwak, kito agiah kopi sebagai makanannyo, lalu kito taranakan kopi dari ciriknyo. Bana coitu??”

“Sangaik Mak. Hebaik juo Mamak yo” ambok Iben maraso di ateh angin.

Mandanga ambok nan kali ko, Mak Ponde langsuang manyambua ndak bisa manahan galak.

“Baa lah tambah ngangak ang ko Bennn”

“Bato Mak, wakden bapangangak-an taruih se. Kok ndak amuah Mak mamodali indak mulah. Tapi ndak elok tadorong-dorong bana mode tu do” baleh Iben manyada nanpak indak sanang

“Hooooiii Ben, lai mangarati ang nan kopi Luwak tu?” lanjuik Mak Ponde batanyo. Kaluah Iben sabanta ko baliau acuahkan sajo.

“Kok ndak mangarati, ndak ka den ajak Mak babisnis do. Marantau den yo ndak salasai do Mak, tapi kalau sakadar urusan kopi mangopi ko, lai jaleh dek wakden mah” lanjuik Iben manumpahan isi paruiknyo.

“Hahaha, di siko nampak ngangak ang. Nan kopi luwak tu indak kopi cirik Luwak do Ben. Tapi, kopi nan dipiliah dek Luwak untuak dimakannyo. Kato kuncinyo “kopi pilihan Luwak”. Kok ka bataranak-an takah kecek ang tadi, indak babeda jo mamintak kopi nan lamak ka tahanan bawah tanah jaman Japang dulu do tu. Kapuyuak ang blender, tu ang buek takah kopi, abih juo disantuangnyo mah. Ngango.”

“Kalera gaek ko mah, jaleh deknyo ruponyo”, Iben manggumam dalam hati sambia manyuruakan “muko kota”nyo nan lah merah co kapitiang abuih.