Wednesday, April 25, 2012

(29) Pamain Batu Dibatukan

Sajak kajadian bininyo tantangkok selingkuh di dalam oto. Iben nanpak agak takucak. Baa ka indak, si Bini bukannyo mangaku salah sarato mamintak maaf. Tapi, malah babaliak manyarang Iben. Alasannyo, inyo selingkuh dek Iben indak lai saupo dulu.
Udin jo Amir nan dari tadi duduak mangawani Iben nampak sibuk jo usaho masiang-masiang. Amir sibuk mauruik-uruik bahu Iben nan indak takilia. Udin sibuk mamparatian Iben sambia bapikia, yo malang kawan ko, hitam kuliknyo, kalek nasiknyo.
“Baa Ben, lai ado kemajuan?”
Udin bukak suaro sangajo maajak Iben bacarito. Siapo tahu, kok lah dicaritoan, lapeh juo sasak ko agak saketek.
Mandanga tanyo ko, Iben mancaliak sabanta, lalu baliak manakua sambia manjawek.
“Apo nan ka lai, tambah manjadi-jadi inyo kini”
“Manjadi apo?” sambuang Amir dari sampiang.
“Manjadi mande Malin Kundang”
“Mukasuiknyo?” lanjuik Udin maningkahi.
“Kini anak-anak nan dikutuaknyo”
“Ohhh, mantun…”
Hanyo iko nan kalua dari muncuang Udin jo Amir. Katigonyo langsuang tabanam dalam diam. Pikiran masiang-masiang sibuk jo topik utamo, apo nan tajadi jo bini si Iben, kok lah takah itu bana?
Ben” sapo Udin baliak.
“Apo?”
“Maaf yo. Lai buliah den tau baa jalan caritonyo?” lanjuik Udin bahati-hati maaleh tanyonyo jo kato maaf.
“Carito aa juo lai. Kan lah jaleh tu. Awanyo manuduah wakden selingkuh, kini mangutuak anak-anak. Karano, anak-anak ko ndak amuah jo inyo, nionyo jo wakden”.
“Mukasuik kami, baa proses hebohnyo, kok bisa mode iko”
Sabalun manjawek, Iben mahiruik kopinyo sataguak, mancubo mangumpuakan memori mangana-ngana.
“Awanyo takah iko. Baliau mamintak pitih pagi-pagi, den sangko untuak balanjo rumah tango. Ruponyo indak, karano nilainyo ndak masuak aka jikok untuak kaparaluan rumah tanggo. Dek ngotot juo, pado heboh, wakden agiahlah sabara ado se, lai labiah daripado untuak kabutuhan rumah tango”
“Wakatu tu baa reaksinyo”
“Lai biaso-biaso se nyo. Malamnyo, antah baliak dari mano, baliau ko lah mararah se co urang tasapo. Manuduah wakden selingkuh sahinggo ndak amuah maisi kandak inyo.
Dek manimbang kadaan juo, den tahanlah emosi bia nak jan taungkik kasus tatangkok ko di muko anak-anak. Namun, anak-anak lah talanjua tahu. Jadi, sabalun ka  wakden, ruponyo lah mararah dulu ka anak-anak sarato mamburuak-buruakan wakden guno manutuik balang surang” papa Iben manjalehan.
“Oh, mantun. Lah main karek kayu baliau ko mah yo” salo Udin maningkahi barusaho maikuiki emosi Iben.
“Ndak main karek kayu lai do tu. Kok dek wakden, lah main batu namonyo mah” tambah Amir indak pueh jo kato-kato main karek kayu ko.
“Tasarahlah eh, kok apo ka namonyo. Nan jaleh baa solusinyo?”
“Batanang Ben. Kito pikiakan gak sabanta dulu” jawek Amir mamacik bahu mananangan Iben sambia mahiruik kopi pahiknyo.
“Baa pulo ka tanang kalau takah iko kondisinyo ko” baleh Iben mambuek kaduo konconyo ko langsuang tadiam.
Kiro-kiro sapuluah menit balalu, Udinpun mulai mandehem mamanciang paratian. Nampaknyo lah ado saketek pencerahan dek baliau ko.
“Baa Din?” tanyo Amir langsuang sarupo urang mamburu.
“Baiko Ben. Kok manuruik Den, bini ang ko sadang bamasalah mah. Masalah ko bisa sajo masalah kapribadian atau masalah lingkungan sarupo kawan bagawua urai Udin mamulai analisanyo.
“Mukasuiknyo?” potong Iben tapanciang sambia mangaruikan kaniang.
“Ado suatu karajo atau kongsi gawua nan marusaknyo. Kiro-kiro, bini ang ko lai sumbahyang ndak?”
“Lai, inyo se bajilbab gadang ko mah”
“Oohhh, acok ikuik pangajian?”
“Acok, ka pangajian ESQ ko ha”
“Ha, iko ko mungkin masalahnyo”
“Apo tu?”
“Manuruik wakden, bini ang ko lah terjangkit sindrom Mak Erot mah”
“Jan betele juo Din, ko serius mah” potong Amir sambia mambulalangan mato ka arah Udin. Jaleh kawan tarumuak, inyo malah batele.
“Kecek sia den batele, danga dulu!”
“Lanjuiklah, ndak baa do sambuik Iben mahambek Amir nan masih nio mambantah Udin.
“Pangajian di ESQ ko banyak pangajian tentang ma’rifaik. Tingkek tatinggi dari sabuah pangajian. Cocok untuak urang nan lah sampai ka tingkek itu, indak untuak urang nan alun sampai”
“Jadi, manuruik ang bini den ko samo jo anak itiak nan masuak kolam bitu? Urang lapangan inyo mah”
Iben bakilah takasan mambela bininyo. Sabananyo, maagiah info panimbang bagi analisa Udin di muko.
“Mukasuik den iolah tantangan pamahaman agamonyo. Aratinyo, wakden manduga bini ang ko mangaji indak dari alih. Ibaraiknyo, baraja ndak sesuai jo tanggaknyo”
“Maa pulo ado di agamo nan mode itu tu, Din?”
Amir nan dari tadi banyak diam nanpaknyo mulai tapanciang pulo dek analisa Udin ko.
“Salah ang mangecek ndak ado. Tanggak baraja agamo ko ado. Partamo syariak, kaduo tarikaik, katigo hakikaik, kaampek baru makrifaik.”
“Oh, mantun...” sambuik Amir jo Iben sambia maangguak-angguak balam.
“Mancaliak kurenah bini ang ko, raso wakden, pamahaman agamonyo baru sampai syariaik jo tarikaik. Pendeknyo, sumbahyangnyo baru sabateh manbaco ayaik sarato “rukuak-sujuik” sajo. Karano parilakunyo alun sasuai jo tujuan atau hakikaik sumbahyang nan dibunyikan jo anil fahsyaa-i wal munkar, mancagah diri dari nan kaji jo nan munkar. Lalu, salah masuak, masuak ka ESQ tampek urang mangaja makrifaik”
“Oh, jadi samo jo urang kagadang-gadangan dek bagawua jo urang-urang gadang mah yo?”
“Batua, kawan jendral kan biasonyo lebih bagak dari jendral lai. Apolai sopirnyo, asa lah mambao oto Jendral ko, inyo lah maraso Jendral pulo”
“Batua” sambuik Amir turuik mambanakan.
Samintaro itu, Iben nanpak badiam diri sajanak mainok-inoki katarangan Udin ko. Raso-raso lai tamakan, inyopun mintak tambuah.
“Tapi, apo iyo saburuak itu efek pangajian ESQ ko?”
“Indaklah. Karano, walau ndak ado landasan ilmiahnyo. Ado juo urang nan cocok. Jadi, sifaiknyo cocok-cocokan, karano prosesnyo ndak bisa dijalehan. Makonyo, tadi wakden sabuik bini ang tasarang sindrom Mak Erot. Pikirannyo taintimidasi jo urang-urang nan cocok tadi sarato suasana di ruangan pangajian tu”
“Taintimidasi jo suasana ko baa mukasuiknyo?”
“Urang-urang ko kan urang hebat lua dalam. Jadi, nyo tirulah sagalo nan ado di urang tu. Harapannyo tantu, jikok kito cubokan pakaiannyo, mudah-mudahan nan intinyo ko manuruik pulo jo awak. Urang bajilbab gadang, awak bajilbab gadang pulo, urang basorban, awak basorban pulo, urang babatu akiak, awak babatu akiak pulo”
“Oh, baitu. Ha, baru takana dek wakden.” Sambuik Iben capek sarupo urang nan baru mandapek sasuatu.
“Apo tu?” songsong Amir manjapuik bola.
“Bini den ko kini disampiang bapakaian takah itu, babatu akiak pulo mah. Batu dalimo kalau ndak salah” lanjuik Udin mamapakan
“Halah, yo lah tamakan cirik barandang tu mah” baleh Udin tageh jo galak tempang.
“Bato Din, jan manakuik-nakuikan takah tu?” salo Amir baparingaik nan langsuang di sambuang Iben.
Iyo Din, tolonglah solusinyo
“Mode ko ha. Caronyo mudah sajo, malawan batu tantu jo batu. Bisa juo jo aia, tapi den raso waang ndak punyo wakatu lai. Umua ko masalahnyo”
“Mukasuik ang?”
“Kalau manuruik carito ang tadi Ben, tarutamo tantangan nan suko mamburuak-buruakan sarato mangutuak anak. Wakden manyimpuakan, baraso nan dikatokan dalam Alquran jo khatamallahu ala qulubihim wa ala sam’ihim wa ala abshorihim, lah manjala takah kanker dalam diri bini ang mah. Ikolah nan panyakik rohani nan tiok hari nabi badoa supayo dijauhkan dari diri baliau” urai Udin panjang leba.
Mandanga iko, kaniang Iben tambah bakaruik. Nionyo Iben, Udin langsuang maagiah solusi. Indak bacaramah panjang leba. Karano itu, Iben langsuang mamutih kaji.
 “Tasarah lah Din.  Nan jaleh, kini baa caronyo?”
“Parang batu” jawek Udin tageh.
“Mukasuiknyo?”
“Langkah partamo, karano nan di lawan batu dalimo, kito pakai batu nan banamo badar basi. Tarutamo basipakak jo basibanak. Kok ndak mangkus jo itu, batukan ekonominyo. Usah diagiah pitih malabihi kabutuhan rumah tanggo. Kok ndak mangkus juo, bao anak nan tadi dikutuak untuak manokok palu. Ka pangadilan agamo kito sarahkan. Di siko lah buliah jatuah hukum putuih tampek bagantuang, jatuahkan talak satu, kumbalikan mandaik ka nan punyo, pulangan ka urang gaeknyo” urai Udin langkok, langsuang mamati kaji.
Mandanga caro Udin nan tageh ko, Iben jadi tamanuang. Lalu, sayuik-sayuik sampai, sarupo urang nan mangecek ka diri surang, Iben bukak suaro.
“Ondeh. Tapi, den masih sayang ka inyo”
Mandanga iko, Amir nan mamparatian jadi tatagun. Masalah raso iyo bedo. Indak mudo indak tuo, takulai dibueknyo. Mangana iko sarato dek ibo mancaliak Iben nan tamanuang, Amirpun sato manguaikkan.
Ben! Ang pasti nio masalah ko janiah kan?”
“Iyo lah Mir. Kok ndak ka mangadu den ka waang baduo” jawek Iben sambia mampamainan kotak api-api.
“Kok iyo, cubo kana-kana iko, lai takana, sia di antaro awak nan kakinyo panuah di tukak wakatu ketek dulu?” tanyo Amir balanjuik.
“Bato, ka ma pulo larinyo ko ha. Kok badarahi pulo tukak lamo ambo?” potong Udin purak-purak mamburansang mambuek Iben jadi tagalak.
Tahanlah sabanta darah mudo tu Din ha. Ko demi Iben ko” sangik Amir mancaliak buruak ka arah Udin.
Mancaliak Udin lai suruik, Amirpun babaliak mancaliak Iben, lalu malanjuikkan tanyonyo nan tapotong di muko.
Lai takana baa caro maubeknyo?”  
Lai lah. Nyo hepang Udin dek amaknyo ka pincuran mah. Nyo gusuak tukak tu sajadi-jadinyo, hehehe” jawek Iben sambia galak ketek ka arah Udin.
“Sudah tu?”
“Sasudah Udin manggigia dek dingin, tukak lah dibarasiahan, baru baliau carian baju sarato agiah ubek nan takah kapsul tu ha”.
“Hahaha, lai takana dek ang yo?” sambuik Amir jo hati pueh. Lalu, malanjuikkan jo pokok kaji nan inyo mukasuik.
Nah, takah itu juo maubek tukak bini ang ko Ben”.
Mandanga iko, Iben jo Udin nanpak maangguak-angguak patando satuju. Lalu, Udinpun sato manambahkan.
“Jadi, ijan jo aia sagayuang bini tu ang siram. Inyo kadinginan, badannyo ndak pulo barasiah. Kasudahannyo, dek ndak jaleh tujuan ang manyiram, inyo dandam ka waang. Makonyo, siram inyo basah-basah, sampai tarangkek miang di badannyo tu. Kok lah tarangkek miang ko, tantu inyo sadar jo tujuan waang manyiram. Mamandian atau mamabarasiahan wakden ruponyo uda ko pikianyo kasudahannyo”.

No comments:

Post a Comment