(35) Celana Anu

Malenceang dari rancana samulo nan hanyo duo hari, urusan PT mambuek Iben jo Amir tatahan di Jakarta hinggo limo hari. Hal iko mambuek Iben kalang kabuik karano hanyo mambao baka sacukuiknyo. Itupun lah dibaliak bak urang mamuta kaset, dari side A dibaliak ka side B.

Siangko ko, dek ndak tahan lai dek gata, Ibenpun nekat pai balanjo ka swalayan di dakek panginapan.

Kiro-kiro 20 meter sabalun pintu masuak, Iben mamparatian dulu tampek nan ka nyo tuju, saroman garong nan sadang manggambar. Kutiko itu, ado cewek kamek di muko swalayan nan indak pasai-pasainyo manyapo tiok urang nan lalu. Cewek ko pasti elok mah, pikia Iben. Karano itu, inyo baniak nak batanyo ka cewek ko sabalun masuak, bia nan jan sasek tibo di dalam.

“Permisi Mbak, stunt celana sebelah mana ya?”

“Celana ya, lantai dua pojokan kanan” jawek si cewek sambia galak bak balam mahu sadang dijujai.

“Makasih Mbak”

“Sama-sama, selamat belanja” Si cewek kamek mampasilahkan Iben masuak jo kode tangannyo.

Sasampainyo di lantai duo, Iben langsuang manuju pojok kanan sasuai info nan nyo tarimo. Dek indak kunjuang manamukan barang nan inyo cari. Akhianyo, Iben baputa-puta sajo saroman urang gilo.

Sasudah labiah kurang 30 minik mausai, barang nan dicari ko indak juo kunjuang basuo. Iben mulai nanpak putuih aso, inyo gilo baputa kasuok kakida sambia manggawuik-gawuik kapalo. Mungkin karano tingkah nan agak jangga ko, ditambah pulo jo panampilan nan sabana kuma. Pagawai-pagawai swalayan nan kabatulan cewek sadonyo, mulai curiga. Lalu, salah surangnyo mambaranikan diri manamui Iben.

“Ada yang bisa dibantu Mas?” tanyo nyo masih jo rono galak baitu tibo di muko Iben.

“Ah ndak, saya cuma lagi bingung nyari celana” jawek Iben apo adonyo.

“Celana apa ya? biar saya bantu nyarinya” lanjuik cewek ko.

“Hem, makasih Mbak, bi..biar saya cari sendiri aja”.

Iben manjawek tagagik-gagik co ayam tamakan kajai. Batulak-balakang bana jo palanggan lain nan pasti akan sanang kutiko dibantu. Pasti ado apo-aponyo, pikia si pegawai kamek mangiro-ngiro. Pado tajadi apo-apo, si pegawai pun langsuang manskak matian Iben.

“Maaf Mas, dari tadi kami memperhatikan tingkah mas, mencurigakan sekali. Kalo mas ga terus terang, saya panggil sekuriti lho”.

“Aduh, jangan Mbak, nanti saya dikira maling lagi” jawek Iben sambia mamasang rono muko maibo.

“Makanya, ngomong yang jelas, lagi nyari apa. Jangan bikin orang curiga gitu” lanjuik cewek ko kasa.

“Aduh, gimana ya?”.

“Hayuuuk”

“Hem, saya sebenarnya lagi nyari celana Mbak” jawek Iben akhianyo, walau masih jo lidah tagagik-gagik.

“Iya, celana apa?” kecek cewek ko sambia manggadangan matonyo.

“Halah, celana apa ya?”

“Hayuuukkk, cepetan” Dasak cewek ko kini sambia mangacak pinggang.

Dek paniang ndak tau jo namonyo, ditambah pulo jo teror cewek kamek nan indak baparasaan ko, Ibenpun akhianyo nekat. Di ma tibo se lah, gumam Iben dalam hati. Inyopun langsuang manjawek.

“Celana burung”

“Celana burung? maksudnya?” tanyo cewek ko mangarinyikan kaniang patando binguang.

“Ini mbak, yang buat di dalam”, lanjuik Iben manjalehan.

“Busyet dah, kolor?” sambuik si Mbak histeris sambia galak takekeh-kekeh. Iben hanyo bisa maangguak sambia malengah manyuruakan muko nan merah karano malu.