(40) Ulah Takicok BB Juo

Baitu turun angkot, Udin langsuang bagageh manuju loket travel, Bukittinggi-Padang. Mancaliak urang rami, inyo nekat manyalib di salo-salo antaro duo travel nan sadang parkir. Iko untuangnyo kalau langsing, gumamnyo sambia bajalan manyampiang.

Tibo-tibo, pintu oto sabalah kida tabukak, mambuek laju Udin tahambek.

"Maaf, sabanta Da" Kecek laki-laki kuruih nan kalua dari oto maangkek tangan ka Udin.

"Yup" Udin manjawek ikuik maangkek tangan.

Baitu mato Udin jo mato laki-laki kuruih ko baradu, kaniang kaduonyo kompak samo-samo mangaruik.

“Eeh, Udin ndak?, pareman reket?” kecek laki-laki kuruih ko spontan sambia manunjuak-nunjuak.

“Halah, Codoik kan?, pareman Banduang?” sambuik Udin mambaleh jo nan sapadan.

Kaduo urang ko lalu basalaman sambia galak takekeh-kekeh. Codoik adolah kawan sapamainan Udin wakatu SMA. Samo jo Iben sarato Amir. Kaduonyo bapisah kutiko Codoik pai marantau mancari hiduik ka kota Banduang.

"Hahaha, lai takana juo dek kawan awak yo" lanjuik Codoik masih taruih mangguncang-guncang tangan Udin.

“Lai lah. Tapi, kok ndak salah, den danga dari Iben ang di Banduang” baleh Udin sambia baliak batanyo.

“Iyo. Dek ndak mangkuih lai ilimu den di Banduang, tapaso lah pulang. Kini di siko lai, pado manganggur, dicubo pulo jadi agen travel ko lai, hehehe”.

Udin manyimak sambia mancaliak Codoik lakek-lakek. Dalam hati Udin bakato, kok lah bantuak iko bana si Codoik ko? Lah bantuak pianggang lapa sajo. Panjang, kuruih, dan kariang.

“Hoi Din, malamun. Mangopi wak lu lah!”

Sapo Codoik mangajuikan jo manapuak bahu Udin. Lalu, manjujuiknyo ka kadai kopi subalah loket. Udin nan malangkah agak tauntok-untok akhianyo mancubo babaso mahambek niek Codoik ko.

“Ondeh, wakden nio bana ko Doik. Tapi, den harus ka Padang sanjo ko juo. ” jawek Udin taruih tarang karano sabananyo masih taragak jo kawan lamonyo ko.

“Tanang, beko den asiangan bangku” baleh Iben sambia taruih manjujuik tangan Udin.

Sasampai di kadai subalah, Codoik langsuang mamasan kopi sambia mamatuik-matuik mancari tampek duduak nan gak sero. Kaduonyo lalu sapakaik duduak di bangku paliang suduik. Baitu ikua kaduonyo tacacah, si Upiak anak tukang kadai datang mahidangan kopi ka ateh meja

“Kopi special pakai goreang pisang angek, ndak pakai lamo, yo kan?” baso-basi si Upiak sambia mahidang.

“Hahaha, tarimokasih, Piak” baleh Codoik sambia manyalai rokoknyo, Gudang Garam Merah.

Mancaliak rokok Codoik ko, galak Udin langsuang manyambua indak bisa ditahan. Hampia taserak kopi nan taserak kopi nan talatak abeh dibueknyo.

“Manga Din?” tanyo Codoik taheran-heran.

“Sabanta” jawek Udin sambia manahan galak. Tangannyo langsuang mamacik kaniang Codoik.

“Manga ang? tasapo?” Codoik batanyo baliak, dek samakin heran jo kalakuan Udin ko.

“Itu nan ka wakden tanyoan ka waang?” baleh Udin sambia manahan galak.

“Mukasuik ang?”

“Wakden resek kaniang, lai normal suhunyo. Tapi, baa kok lah sampai tronton plat merah ko kini nan bahisok?” galak Udin lansuang manyambua di ujuang cilotehnyo.

“Ee yayai, iko rokok nan sihaik. Ngango ang mah” dalia Codoik mambela diri.

“Hahaha, waang nan ngango. Maa pulo ado rokok nan sihaik dek ang?” jawek Udin mahambek dalia dadakan Codoik ko.

“Di siko nanpak lamah ang Din. Makonyo jan jo buku sajo bagawua, hehehe” baleh Codoil sambia galak mancimeeh mamanciang emosi Udin.

          Baitu galak Iben taujuang, Udin langsuang manyambuang jo ciloteh padeh.

“Nan sata-u wakden lah, rokok ko sumber panyakik. Batuak badangkang dek karano rokok, urang bansek pun dek karano rokok juo” papa Udin maagiah referensi.

Mandanga ko, Codoik langsuang mamuta aka, mancari jurus pamungkas bia lidah bisa basilek. Kalaulah indak ka bisa mahantam, minimal bisa mambandiang dalia Udin di ateh.

“Jadihlah, batanyo den ka waang ciek. Tapi, basyaraik, ang harus jujur ha!” lanjuik Codoik mambukak balabeh maajak Udin bamain adia.

“Jadih, aa tu?” jawek Udin maraso tatantang.

“Takana dek wakden, Pak Etek ang aa rokoknyo?”.

“Eeh, ko talonsong ko. Manga lo Pak Etek den dilibatkan, baliau ndak sato bagai do”

“Amai ang, jawek se lah dulu, waang lah bajanji” baleh Iben pura-pura berang maingaikan.

“Hem, samo jo waang” jawek Udin singkek.

“Profesinyo?”.

“Dukun badah ay….”

Alun salasai Udin manyabuikan profesi Pak Eteknyo ko, Codoik lah langsuang maminteh.

“Ha, itu. Kan urang kesehatan dek ang tu. Berarti rokok ko rokok kesehatan. Kalau indak, salahkan Pak Etek ang tu” potong Codoik capek sarato tapek.

“Hahaha, iyojuo yo” jawek Udin ndak dapek manahan galak mamahami trik kawannyo ko dalam mahiduikan suasana.

Dek naksir jo trik ko, Udinpun taruih mamanciang Codoik.

“Kalau nan ciek lai?”.

“Nan ma?” jawek Codoik heran.

“Kecek den tadi, kan rokok ko mambuek bansek, baa manuruik ang kiro-kiro?” Udin bausaho maingekan.

“Oohhh, nan itu. Banyak urang nan kayo dek rokok ko” baleh Codoik PD bana.

“Sia?”.

“Nan jaleh banyak” jawek Codoik asa sajo

“Kok itu ndak bisa dipicayo do tu” sambuik Udin mode urang patah samangaik.

Mancaliak Udin nan mode lilin tahambuih angin ko, Codoik pun mangalah, malanjuikan uraiannyo.

“Simak dek ang yo. Kalau memang rokok ko marusak, baa kok masih batahan sampai kini dek ang, baa kok ndak ditutuik dek pamarintah?”.

Maraso ditantang jo pertanyaan ko, Udinpun mambaleh.

“Ee yayai, rokok ko lah jadi budaya mah Ben. Budaya urang-urang nan ndak tau diri takah ang ko. Dek lah jadi budaya tu, makonyo sulik dibasmi” tarang Udin sok filosofis.

“Hahaha, salah ang mah” sambuik Codoik sambia galak.      

“Tu aa nan batua?” sanggah Udin indak sanang teorinyo dicimeehan Codoik. Maso ka kalah pulo wak jo pareman oto ko, sajak tamaik sakola, mambaco buku se antah indak lai, gumam Udin dalam hati.

“Nan bananyo, dek banyak urang nan talalu kayo sarato turuik manikmati hasia kayo nan disabaikkan dek rokok ko” gelek Codoik tageh.

“Buktinyo?”.

“Di Negara wak ko. Asa dapek prediket 10 besar urang takayo, ndak ka tausik dek hukum do. Nah, juragan rokok ko tamasuak di dalamnyo” sambuang Codoik manjalehan.

“Taruih?”

“Aratinyo, baa pamarintah ka manutuik rokok ko. Karano pamarintahpun turuik manikmati pitihnyo. Balanjo nagara pun ndak saketek dari pitih rokok ko do ko” ciloteh Codoik mangalia dareh.

“Jadihlah kok baitu. Tapi apo nan mambuktikan baraso rokok ko ndak marusak kesehatan. Bara banyak urang nan badangkang-dangkang batuaknyo dek rokok ko dek ang ko Ben” tantang Udin mambaleh sangajo mambaliakan fokus ka dalia panyakik, batuak badangkang.

“Halah, bara banyaknyo kambiang nan badangkang-dangkang batuaknyo di Pasa Morohot tu dek ang ha. Ndak ado nan marokok sikua juo do tu” baleh Codoik capek, tapek, padek. Nanpaknyo codoik ko sadar kalau Udin sangajo nio manyuduikan inyo. Makonyo, inyo bahati-hati manggelek.

“Kama lo painyo tu” songsoang Udin sakananyo sajo.

“Intinyo baiko. Sabagai rakyaik badarai takah kito-kito ko. Ibaraik salah makan, awak ndak bisa manyalahkan makanan atau urang nan mambuek sarato manjua sajo do. Nan salah kito nan indak mancaliak kondisi kito”.

“Kalau sabagai pamarintah atau pihak nan mamacik tampuak?” salo Udin langsuang mamintak tambuah.

“Usah lah baharok ka pamarintah tu” Codoik manjawek mode urang maleh.

“Baa tu?”.

“Jan kan ka manyalasaikan masalah rokok nan takah kecek ang tadi lah mambudaya. Manyalasaikan kasus Melinda Dee se gamang-gamang baliau-baliau tu nanpaknyo” lanjuik Codoik santai.

“E-eh, marokok pulo Melinda Dee ko?” tanyo Udin sangajo balagak tengak sakadar mamanciang Codoik.

“Iyo, banyak rokok pihak pamacik tampuak tu nan dihisoknyo mah” sambuang Codoik emosi masuak parangkok Udin.

“Hahaha, bato marabo se, takuik den jadinyo ha” baleh Udin galak maingaikan Codoik.

“Mukasuik wakden, asa takaik jo pitih, ado bana lah BBnyo, usah baharok ka nan bawenang. Karano, baliau-baliau tu pasti turuik manikmatinyo”.

“Apo pulo hubungannyo jo Melinda Dee tadi?” tanyo Udin dek sabana ndak manangkok arah Iben ko.

“Ee yayai, pitih tu lah abih dipakainyo ntuak operasi silikon jo kecantikan. Lai ka talok ang manyita BB nyo?”

“Hahahaha, masuak Doik”

“Baa?” tantang Codoik mamonyongan bibianyo ka Udin ko.

          “Sadang gigolo se bisa manikmati, masa urang-urang hebat nan takaik pulo indak ka sato? Kok bitu, wakden pun maleh manyita mah, ncak sato pulo manikmati lai hahaha” lanjuik Udin sambia taruih galak-galak.

“Waang kan bitu. Kok sanang galak se surang, basokan bagai lah wakden, hahaha” baleh Codoik jo galak nan sarupo.

Maota jo konco lamo ko sabana manyanangkan. Kini, ikolah nanpaknyo nan taraso bana dek kaduo orang ko. Kaduonyo indak baranti maota jo bagalak-galak hinggo oto nan ka maantaan Udin ka Padang masuak ka dalam loket.