(32) Pakailah Istri Seperlunya!

Sajak Iben maambiak kaputusan bacarai jo bininyo. Duo konconyo, Udin jo Amir jadi acok mangawani. Malam ko, katigonyo nanpak sadang bakumpua di kadai kopi. Kawannyo tantulah kopi bintang tigo jo goreang pisang, panukuik, sarato bubua kacang ijau. Kasadonyo haruslah angek. Sabaik, menu ko adolah caminan urang kadainyo. Dingin menunyo berarti dingin pulo urangnyo. Sia pulo nan ka balanjo. Angek menunyo, angek pulo urang kadainyo. Alamaik ka panuah kadai dek urang balanjo, satidaknyo jo urang bacarito. Kalaulah ado nan bacarito, tantu kopi ujuang-ujuangnyo. Indak ka mungkin ka maota kariang sajo.

Jadi, antaro menu angek, urang balanjo, sarato urang bacarito, bisa dikatokan sabagai rajo nan tigo selo. Bisa juo disabuik jo tungku nan tigo sajarangan. Urang tibo aia dijarang, carito mulai kopi tahidang, goreang pisang ndak buliah tingga. Iko pulolah kini nan lah manjambo dihadapan rajo nan tigo selo di muko, Amir, Udin, Iben mamulai bacarito.

“Paniang wakden mancaliak pamarintah ko” sunguik Udin nan partamo mambukak carito.

“Sado urang paniang mah Din, tapi ndak ado nan baturo-turo takah ang ko doh” Amir langsuang maminteh

“Ndak ado baa dek ang ko, caliaklah di TV baritonyo” jawek Udin kareh dek maraso dipatahkan.

“Jadihlah, kok waang apo nan waang paniangan, makan jawi ang ndak BBM do mah” baleh Amir.

“Anak jo bini den” Udin ndak amuah kalah.

“E-eh, ko sero ko. Kok sampai lo ka anak-bini?” potong Iben nan dari tadi hanyo diam manyimak.

“Lah, gara-gara BBM naiak ko, ketenangan rumah tanggo bahagia den tagaduah. Anak den jadi paniang dek BBnyo, baitu juo jo bini den. Sampai ndak amuah den dakek-i dek lah BB ko. Ndak ka paniang den dek ang tu?” jaleh Udin panjang-leba.

“Hahaha, tapi ka baa juo lai Din, kito rakyaik badarai ko tantu tapaso mauruik dado sajo” sambuik Amir galak.

“Iyo Din, waang takah ndak tau jo pamarintah nagara wak se” salo Iben pura-pura maradam. Sabananyo mamanciang kaributan.

“Lai tau wakden, tapi mulai kini, den ndak ka mau tau lai do” umpek Udin makin manjadi. Maklum ado urang nan manyabaan.

“Indak buliah coitu do Din” umbuak Amir lalu malanjuikan mantra pandinginan.

“Baa ka baa, itu pimpinan awak mah. Nan awak piliah, nan awak tuokan, nan awak dahulukan salangkah tinggikan sarantiang, kan bitu ndak Ben?” umbuak Amir sambia mamuta kapalo ka Iben Amir mamintak dukungan.

“Indak, wakden ndak sato do, wueee” jawek Iben manyangka sambia mancibia.

“E yayai, baa pulo waang ko Ben? baa ka baa waang ko warga negara, suko ndak suko harus sato” lanjuik Amir protes maraso dikarajoan.

“Indak kecek den. Wakden ko rakyaik badarai, jo binipun alah bacarai. Tapi, wakden indak bodoh” baleh Iben makin mararah.

“Walau co iko, nan wakden ko lai manyimak mah. Manuruik wakden, nan pamarintah ko ndak ka barubah gai do. Malah mungkin labiah parah bisuak-bisuak ko. Itu pulo kadituruikan tu” lanjuik Iben manambahkan.

“Ndak buliah sumbarang tuduah se takah tu do Ben” potong Amir langsuang manyanggah.

“Iyo Ben, beko kanai tangkok ang beko” tingkah Udin sato pulo maningkahi.

“Maa pulo ado carito tangkok-tangkok kini lai ko”

“hahaha, ndak ado tangkok-tangkok baa pulo ko Ben. Negara ko negara hukum ko mah” galak Amir mancimeeh. Karano manuruiknyo tingkah Iben ko lah bantuak pareman  karek kayu sajo.

“Hahaha, di siko nanpak kalah ang dek wakden Mir. Kalau wakden ditangkok, tantu makan den ditangguang, listrik den baitu juo, kabutuahan aia den tabao rendo. Sadangkan kini, pamarintah tu se amuah baturo-turo jo mahasiswa demi APBN. Bagi wakden, itu lah jaleh manunjuakan tando putuih aso tu mah. Bilo pulo masonyo ka mamikiakan wak den lai?” papa Iben mangamukokan alasannyo.

“Tapi, panjaro tatap jalan Ben. Kalau indak, pacuma sajo lah reformasi” tantang Amir makin manjadi.

“Reformasi ko ndak jaminan baraso kini labiah baiak. Karano nan nyato adonyo repotnasi. PLN mangecek rugi, PDAM mungkin santa lai ka mode itu juo, sia pulo nan ka talok maagiah makan??”

“hahaha, iyo juo tu” galak Udin mambanaan. Indak ado angin, indak ado hujan, Udin kini bakisa tagak ka pihak Iben. Atau mungkin juo Udin maraso lai Iben nan ka manang hehehe.

“Tapi, kecek wakden tu kan marujuak ka pasa nan biaso kawan” sanggah Amir mambela diri dek maraso mulai dikaroyok.

“Tapi, ijan dibiasokan, apolai kalau awak jadi pimpinan nantik” jawek Iben tatap kareh. Mamandian urang iyo harus basah-basah, baitu prinsip hiduik Iben.

“Kalau bukti baraso kadaan ko ka batambah parah apo pulo?” gelek Amir sangajo maalihan isu dek takuik kanai karoyok.

“Kalau itu, wakden raso Udin tantu labiah tau” jawek Iben mantap sambia maarahan talapak tangannyo ka arah Udin.

Sajak Udin duduak dakeknyo sabanta ko. Lah tabayang dek nyo baraso Udinpun sananyo nio mahajar Amir nan sok paten ko. Kini ko kito karoyok sajadi-jadinyo, jikok paralu dipijak-pijak sakalian hahaha.

Amirpun langsuang madok ka Udin.

“Apo Din buktinyo?”

“Kini den batanyo ka ang Mir. Tapi, basyaraik ha, ndak buliah protes, dan jawek sajo jujur-jujur” aleh Udin mancari tampek bapijak sabalun mulai mamaparan.

“Jadih, jujur tu lah manjadi darah den tu mah” jawek Amir manyanggupi.

“Pernah kan mandanga isu krisis bareh?” tanyo Udin nan partamo.

“Pernah, kapatang ko mah”

“Apo solusinyo?"

"Berdayakan pangan nan lain”

“Slogannyo?”

“Slogannyo, sahari tanpa bareh”

“Tau waang mukasuiknyo?” lanjuik Udin capek.

“Lai, demi mamuta roda ekonomi” jawek Amirpun ndak amuah kalah capek.

“Batua, dan untuak itu, sakali-kali ganti bareh di rumah ang jo sagu, bondang atau ubi kayu, lai amuah ang?” sarang Udin tibo-tibo.

“Tu ndak ka mungkin se do tu. di ma lo harago wakden sabagai pimpinan keluarga” kilah Amir ndak badayo jo suaro agak tagagik.

“Hahaha, masuak ka isu salanjuiknyo. Kalau krisis BBM?” lanjuik Udin mambaco tanyo kaduo, maacuahkan atau sangajo mamnfaikan Amir nan masih tangango.

“Tapi iko kini kan sadang kito patangkaan ha, waang nan mambukak carito tadi mah”

“Batua. Apo solusinyo?”

“Kanaikan harago”

“Slogannyo?”

“Hemat energi untuak manjago stabilitas ekonomi”

“Tau waang mukasuiknyo?

“Lai, hemat pangkal kayo ko ajarannyo”

“Batua bana. Tapi, apo iyo maaja anak hemat jo manaikkan harago gulo-gulo?”

“Indak lah, maa pulo paduli anak-anak jo harago tu” jawek Amir agak mantap tapi binguang jo mukasuik tanyo Udin ko.

“Oke. Kito masuak ka isu nan salanjuiknyo. Kalau krisis listrik?” lanjuik Udin nanpaknyo sangajo mambiakan Amir nan masih binguang.

“Acok”

“Solusinyo?

“Pamadanan bagilia jo kanaikan tarif”

“Slogannyo?”

“Gunakan listrik seperlunya!”

“Tau ang mukasuiknyo?”

“Tau lah. Pamadaman bagilia jo himbauan mangurangi pamakaian listrik ko kan demi kito juo ko, save the world judulnyo mah” jawek Amir langkok jo dalianyo.

“Mantap. Kito lanjuik. Kalau krisis penduduk?” tanyo Udin sugiro balanjuik. Kali ko nampaknyo sangajo nak mamanuhi memori Amir jo tando tanyo.

“Salamo reformasi ko rasonyo alun lai”

“Ha, di siko salah ang” potong Udin capek manskak mati Amir.

Iben nan duduak di sabalah langsuang maangguak mangaminan tudingan Udin mambuek Amir jadi tambah binguang. Dalam binguangnyo, naluri bela diri Amir langsuang bakarajo.

“Satau wakden ndak ado do”. Lanjuik Amir sambia mangambangan kaduo tangannyo.

“Hahaha, itu isu nan ka muncua mah Mir” salo Iben sato sarupo urang nan maagiah patunjuak.

“Kalau iyo, apo solusinyo?” sambuik Amir batanyo apo adonyo.

“Paketek kredit sakalian kendaraan”

“Mukasuiknyo?” tanyo Amir jo muko binguang.

“Kendaraan ko kan panyabab kematian tertinggi kini di nagara wak ko. Cocok lah nyo untuak solusi isu kepadatan penduduk ko” lanjuik Udin manarangan.

“Jadihlah, slogannyo apo?”

“Pakailah istri seperlunya….hahahaha…..” jawek Udin mantap disambuang galak gadang baduo Iben.

“Tu pandai-pandai waang se mah hehehe” jawek Amir manyanggah tapi indak bisa manahan galak.

“Paliang indak wakden baraja dari krisis Mir. Indak mancawan se takah angku do” lanjuik Udin nan langsuang ditingkahi Iben.

“Betul betul betul, hahaha”

“Ee, yayai yo, hahaha ” runguik Amir sambia manggawuik-gawuik kapalo, tapi masih bisa galak ketek.