(38) Di Ma Latak Telong nan Batali, Nyeng?

Dek ka maaja duo hari ka Bukitinggi, hari ko, pukua 05.00 wakatu Indonesia bagian Padang, Udin lah duduak di barando jo gaya nan sabana stedi. Lah lakek sarawa bahan hitam, kameja putiah masuak ka dalam, kaco mato tantu ndak tingga. Di muko, tapeknyo di ateh meja lah tahidang kopi bintang tigo langkok jo makanan pagi kasukoan, pinukuik putiah dari kadai Tek Siah.

Samintaro itu, si Mirna, si induak bareh nanpak duduak di subalah sambia sibuk manyimir sipatu. Ikolah resiko balaki guru, pagi-pagi lah harus sibuk maurusnyo. Mulai dari mamastian pakaiannyo indak bakaruik, sampai ka kilek sipatunyo pantang talewaik. Sabaik, usahkan baju nan bakaruik, duo sajo sandiang sarawanyo, alamaik bini nan ka kanai gatah. Pasti ndak diuruih bininyo mah, baitulah kabagalau nan biaso bakambang dari dulu hinggo kini.

Limo minik balalu, Mirna masih juo sibuk manggosok sambia mamatuik-matuik sipatu mamastian baraso ndak ado sapuan simir nan talewaik. Mancaliak iko, Udin mandehem bukak suaro.

“Ehm, alah mah Min. Tipih pulo sipatu tu beko, bulan sayuik ko mah hehehe” sapo Udin sambia galak ketek.

“Hehehe iyo. Lah, pakai lah lai Da” jawek Mirna diiriang galak nan sarupo.

Lalu, baitu sipatu ko dilatakan di ateh lantai, Udin langsuang manyorongan kaki sarato mangabek arek buhua talinyo. Baitu salasai, baliau langsuang tagak diiriangi Mirna. Sambia galak manih kapado induak bareh ko, Udin langsuang manyemba tas jinjiang di kursi muko, lalu balalu manuju rumah sakola, ka tampek asa asok pariwuak.

Hari ko, Udin maaja mato palajaran nan babeda jo bidangnyo. Kok biasonyo, baliau maaja bahasa Indonesia, kini ko baliau maaja mato palajaran muatan lokal, Budaya Alam Minangkabau. Udin indak paduli jo soal bidang-bidang tu. Sabaik, jikok diinok dikanang-kanang, muatan lokal ko kaduduakannyo samo sajo jo bak baro di ateh tunggua, hiduik-hiduik mati. Sagalonyo tagantuang angin isu. Kok lai kancang ambuih angin ko, alamaik lai ka hiduik baro apinyo. Kok lambek, pudualah sang baro ko, hilanglah budaya alam Minangkabau tu.

Pagi ko, sarupo nan biaso, sasudah salasai bacaramah manyampaikan materi jo strategi “autism speech” alias acuah ndak acuah, Udin langsuang maajak muriknyo tanyo jawaik. Kali kini ko, pandangan baliau taarah ka Munyeng, anak didiknyo nan dari tadi nanpak lah co ayam diakuak manahan kantuak.    

“Nyeng!” sapo Pak Udin sakutiko.

“I-iyo Pak”

Jawek Munyeng agak tagagik. Ruponyo, walau sambia maakuak-akuak ayam sarato pikiran nan lah mulai malayang tabang ka dangau tampek biaso mangalai siang, Munyeng masih bisa mandanga suaro sapo ko. Bia ndak katahuan kalau mangantuak, Munyengpun langsuang malanjuikan.

“Ado apo Pak?”

“Lai jaleh suaro Apak dari balakang tu?”

“Lai Pak”

Mandanga iko, Udin langsuang mahantian baso-basi. Lalu, sugiro batanyo guno manilik pamahaman Munyeng tantangan materi nan tadi disampaikan.

“Jadi, di ma latak “telong nan batali” tu Nyeng?”

Tanyo Pak Udin ko langsuang mambuaik saisi lokal manjadi langang sakutiko. Udin nan kanai tanyo nanpak manyipikan mato sarupo urang maingaik-ingaik. Sabananyo, sangajo mahabihan wakatu baharok ado nan maacuangan tangan maajuan diri. Namun, karano ndak kunjuang ado bantuan nan mawujuik, Udin akhianyo pasrah manjawek apo adonyo.

“Ndak tau wak-den do Pak”

“Indak manyimak. Ka lua wak-ang lah!”

Mandanga parintah kareh ko, bukannyo takuik, Munyeng malah girang bukan kapalang sarupo murik nan baru mandapek mandaik dari guru gadang. Sakutiko, inyo tagak lalu satangah balari bagageh ka lua ruangan. Samintaro itu, Udin nanpak kini baraliah mananyo murik-murik nan lain.

Satibo di lua, Munyeng mulai bapikia kareh. Sambia mausok-usok mato inyo manggumam, “jo apo kantuak ka diusia bia bisa mancari telong nan batali ko?, kok ka lalok tantu ndak mungkin…”. Tibo-tibo sajo, langkah Munyeng taranti, lamunannyo pacah, kapalonyo baputa mancaliak ka arah kadai balakang, kantin langganan anak sakola. “Minum kopi jo manggatok bakwan balado kutu nan ka lamak ko mah, kantuak hilang salero lapeh hehehe” gumam Munyeng sambia galak ketek. Langkahnyo taruih balanjuik ka arah tampek tujuan.  

Baru sapuluah minik balalu, lah tandeh bakwan 4 buah jo lado kudu sakawik ketek. Kopipun baitu pulo, tandeh jo dadak-dadaknyo. Dek mangana saku-saku juo, Munyeng akhianyo tagak, manyarahan babarapo pitih ribuan ka Etek kadai. Lalu, langsuang bajalan baliak manuju kelas sambia marangah-rangah takah gaek nan sasak angok. “Yo babayo lado kutu ko, hilang kantuak wakden dek nyo langsuang. Apolai kok ado pulo telong nan batali di sinan. Tantu samparono misi den jadinyo”, gumam Munyeng dalam hati.

Baitu sampai di muko pintu, Munyeng langsuang manokok lunak tigo kali, lalu manguaknyo lambek-lambek. Di muko kelas nanpak gurunyo, Udin sadang sibuk manulihan pokok-pokok kaji dari palajaran hari kini ko.

Mancaliak Munyeng di muko pintu, Udin langsuang malatakan kapua tulih, lalu batanyo manyapo Munyeng.

“Manga masuak Ang?”

“Ndak ado di lua do Pak, lah panek wakden bakuliliang mancari” jawek Munyeng santai jo muko indak badoso.

“Apo nan waang cari di lua?” lanjuik Udin sambia mangarinyikan kaniang.

“E yayai yo. Tapi, tadi Pak mananyo di ma latak “telong nan batali” ka wakden. Tantu den cari di lua”

Mandanga jawek Munyeng ko, Udin langsuang manggeleang-geleang sambia mauruik dado. “Buhua bana nan guyah nanpaknyo ko mah” gumam Udin dalam hati. Karano itu, pado balaruik-laruik jo batele-tele, baliaupun taniak nak langsuang sajo manyuruah Munyeng pulang. Sabaik, jam baraja lah abih juo.

“Usah masuak. Pulang se lah lai” lanjuik Udin sambia malambaian tangan ka arah Munyeng.

“Apolai kok di rumah Pak, ndak ka ado do tu. Rumah se lah panuah jo pot bungo tanaman Amak den. Ma pulo ka ado tampek untuak telong nan batali di sinan?” jawek Munyeng sambia mangambangan kaduo tangannyo pasrah sarupo urang manyarah.

Mahadoki jawek nan indak bakarunciangan ko, emosi Udin akhianyo tapanciang juo.

“Ka ruang BP kini juo!” hariak Udin sambia manunjuak.

Mandanga jawek jo tunjuak nan baalamaik jaleh ko, Munyeng langsuang baliak kanan. Dalam hati Munyeng manggumam sambia manggeleang-geleangan kapalo.

“E yayai, ndak dari tadi nyo kecekan baraso di ruang BP do. Gaek….Gaek….”

Ide: ACT

Cat: Pendidikan=manusia#pakain yang modenya selalu berubah sesuai isu.