Pidato Pasambahan Baso-Basi

Tumpuan Kato (Pihak Tamu/Ujuang)

Jikok ditilik sapanjang panitahan Angku tadi; lah data bak lantai papan, lah licin bak dindiang camin. Tapi samantangpun baitu, tantangan juadah nan ka tangah; jikok diinok dikanang-kanang, masaklah tigo pakaro; partamo masak di dapua, kaduo masak dimakan, katigo masak jo mufakaik. Dikatokan masak di dapua; balayia kapa dari Tiku, Balayia jauah ka tangah lawuik. Basilang kayu dalam tungku, di sinan api mangkok iduik. Batanak jo tungku duo, baronyo kijok-kijokan. Talampau aru jadi bubua, kurang aru luyak mantah. Ka jadi nasi inyo tak namuah, pulang ka bareh inyo lah sagan. Nan kaduo masak dimakan; disanduak nasi putiah kapua, dinanti jo piriang putiah, dikunyah digumam-gumam. Nasi sugiro jadi dagiang, kuah sugiro jadi darah. Nan katigo masak jo mufakaik; balayia manuju daraik, masuak kualo lawuik merah, mandanguang buni lawuik basa, camehlah hati juru mudi. Walaupun jamba tak dikakok, hidangan ndak disantuah, rasolah labiah minum makan. Kok diambiak kato jo mufakaik, kok maaf sakali kini, kabak mano tu Angku.....?

Juru Baso (Sipangka)

Mandanga pituah Angku; tasirok darah di dado, badan bak raso bayang-bayang. Baguncang lawuik sailam, bakumpa karang ka tapi. Baa nan kok baitu; dek kami selang nan bapangka; sabalum alek kami panggia, sarok di laman lah kami sapu, kayu di dapua lah kami kapiang, nasi dimasak dek Rubiah. Sabalum bareh jadi nasi, lah taniaik di dalam hati, ka pananti tamu nan tibo, panjamu alek nan datang. Baatunyo kini; kok bareh lah jadi nasi, nasipun lah sudi jadi hidangan. Nan bak pituah rang tuo-tuo; lalok sakalok barasian,  langkah salangkah ganjua suruik, suruiknyo ka pangka jalan, pangkanyo adaik jo limbago. Manuruik adaik jo limbago; limbago sifaik mananti, jikok undang maisi kandak. Jikok titah alah bajunjuang, rasaki tantu batarimo. Salanjuiknyo, nan bak pituah Angku juo; pulau aia lubuak kilangan, pandan sapanjang muaronyo. Ambiaklah aia basuahlah tangan, rasaki samo-samo kito tarimo. Pulang maklum bakeh Angku.