Pidato Pasambahan Manjalang Pulang (Adu Balam)

Tumpuan Kato (Juru Baso Pihak Tamu/Ujuang)

Angku......, tantangan kami nan sagalo alek, kalau diumpamokan ka buruang banyak; pueh malayang jo malayok hinggok di padang ribu-ribu, hawuih maminum aia ambun litak mamakan buah rumpuik. Jikok litak rasolah kanyang, hawuihpun rasolah pueh. Nak tabang kutiko bak kini manuju pinang nan sabatang, pulang kaasa mulo jadi. Samintaro kaki lai basitumpu, sabalum kapak kadikirai, izin dimintak bakek Angku mah. Sakian Angku.

Juru Baso (Sipangka)

Mandanga pituah Angku tantangan alek nan ka pai; baguncang rumah nan gadang, bagarak tiang ka tujuahnyo. Apo sabab mangko baitu, sabab pintu lah kami santuang arek, janjangpun lah kami ansak jauh. Kamano Angku ka lalu?

Tumpuan Kato (Juru Baso Pihak Tamu/Ujuang)

Koto Rambang kampuang nan jauah, basimpang jalan ka Tandikek, ka hilia ka Kuraitaji, sarato Tiku jo Pariaman, kabasaran Anggun Nan Tongga.  Sungguahpun janjang lah baansak jauh, pintu lah basantuang arek, anak kunci ado di kami, kok lah dapek ujuang parantian, alun diurak nyo lah tangga. kabak mano dek Angku....tu.

Juru Baso (Sipangka)

Taganglah barih jo balabeh, diukua mangkok dikatam. Kamalah Angku ka bagageh, disiko awak bamalam.

Tumpuan Kato (Juru Baso Pihak Tamu/Ujuang)

Nak urang Muaro Paneh, di Solok bakadai kain, tibo di pakan jua bali. Sabaiknyo kami ka bagageh , ado janjian jo nan lain, rumik rasonyo mamungkiri.

Juru Baso (Sipangka) 

Manuruik kato Angku tadi, jikok diinok dikanang-kanang, itulah kato sabananyo. Kok sumbahyang lah tibo di wakatu, alek lah tibo di kutiko. Tapi samntang pun baitu, nan marusuah di hati kami; lah iko malamnyo hari, hari malam jalan bakelok, hari hujan jalan kok alia, iyo tagamang kami malapeh.

Tumpuan Kato (Juru Baso Pihak Tamu/Ujuang)

Sapanjang pituah Angku tadi; dipaliang umpamo cincin, dikisa ibarek galang, bantuak lah dimakan siku-siku. Jikok luruih lah manahan tiliak, balabeh lah manahan cubo.  Tapi sungguahpun baitu, dek kami nan sagalo alek; takalo langkah ka diayun, kok kalam lah kami sadiokan suluah, kok hujan lah kami sadiokan payuang  mah Angku. Alah koh sanang hati Angku.

Juru Baso (Sipangka)

Kok baitu pituah Angku, basuo juo bak gurindam urang Minang; ditarah indak tatarah, lah bak manarah patang sampia, ditabeh iyo nan jadi. Ditagah indak tatagah, lah bak managah aia hilia, dilapeh iyo nan jadi.  Tapi saketek kami banakan; ditabang batang limau puruik, dilatak di tapi banda, dibaok ka Kinari. Datuak datang karano japuik, kok pulang indak kabaanta, turuik sajolah jalan nan tadi.

Tumpuan Kato (Juru Baso Pihak Tamu/Ujuang)

Kok indak ka Angku latak di ateh dulang, latakkanlah di ateh cawan. Kok indak ka Angku anta sampai pulang, silauan juolah sahinggo jalan.

Juru Baso (Sipangka)

Pado kami latak di ateh cawan, bialah kami latak di ateh dulang. Pado kami anta Angku hinggo jalan, bialah kami silauan sajo dari janjang.

Tumpuan Kato (Juru Baso Pihak Tamu/Ujuang)

Mandanga pituah Angku, sanang rasonyo dalam hati; Ibarek palak tarangkek baju, ibarek talang tarangkek miang. Tapi samantang pun baitu, tantangan kami nan sagalo alek; banyak rundiang kok banyak nan sasek, banyak kecek kok banyak nan salah.  Gajah kok tadorong dek gadiangnyo, harimau kok talompek dek balangnyo.  Tuhan nan basifaik kadim, manusia basifaik gawa. Kok ado khilaf jo gawa, sakali gawa baribu ampun, pintak kami kapado Angku.

Juru Baso (Sipangka)

Urang nan arih sarato bijak: tembaknyo baalamaik, katonyo bakiasan.  Kilek baliwuang mahadang kaki, kilek camin mahadang muko, kilek kasai hinggo ka aia, kilek kato hinggo ka hati. Tantangan nan takilek dek Angku nantun; manganai muluik nan tadorong jo kato nan talompek taradok kami selang nan bapangka. Kito pulangkan sajo nan bak gurindam urang Minang Angku; kalilawa di pulau Rambang, anak ruso mati badabiah. Kok gawa dapek ditimbang, kok doso ampun nan labiah. Kok ado salah jo gawa dari Angku nan sagalo alek, lah basamo kami mamaafkan.

Tumpuan Kato (Juru Baso Pihak Tamu/Ujuang)

Mandanga pituah Angku, sanang rasonyo dalam hati, sajuak rasonyo kiro-kiro.  Jikok lah bahimpun rila jo maaf, lah batimbang baso jo basi, lah sanang pulo hati kami. Bak gurindam urang tuo; bakacimpuang ikan di lubuak, takajuik diserak jalo, ikan banamo si Kulari. Rila jo maaf kok lah batumbuak, lah batimbang basi jo baso, jo salam sambah kami sudahi mah Angku.  Assalamu alaikum warahmatullahi wa barakatuh.