Gadang Nan Sabingkah Tanah, Kabasaran Nan Salingka Aua, Tuah Malingkuang Minangkabau (Coremap Kajian Kadudukan Panghulu I)

Sagalo karajo tantangan adaik nan ka dikakok, diarahkan dek adaik Minangkabau malalui ungkapan “cupak tatagak nan kadiisi, ragian takambang nan ka ditiru”. Ikolah panduan umum sarato batasan kutiko kito mangakok sagalo sasuatu, tamasuak dalam mangaji tantangan kabasaran Panghulu sarato masalah bantuak nyatonyo dalam lingkuang adaik salingka nagari.

Ado babarapo ungkapan nan manggambarkan tantangan kabasaran Panghulu ko:

1.   Panghulu adolah “urang nan gadang basa batuah”.

2.   Gadang nan “sabingkah tanah”, kabasaran nan “salingka aua”, tuah malingkuang Minangkabau.

Jikok kito inok manuangkan kaduo ungkapan di ateh, dapeklah babarapo gambaran:

1.   Kabasaran Panghulu diistilahkan jo tigo kato kunci (baco: gadang, basa, tuah).

2.   Wilayah geografis Panghulu adolah kaum (sabingkah tanah).

3.   Wilayah adaik Panghulu adolah nagari (salingka aua).

Jikok suduik pandang tantangan kajian kabasaran Panghulu adolah tantangan manusia jo kapasitasnyo. Mako, tantulah kaji kito barujuang pado tangguang-jawaik Panghulu, yoitunyo manyalasaikan urusan anak-kamanakan.

Nan dikatokan anak kamanakan bagi Panghulu, di dalam pituah pakaian baliau disiraikkan jo ungkapan “nan sapayuang sapatagak, di bawah payuang di lingkuang cupak”. Mukasuiknyo, anak kamanakan Panghulu ko banyak, indak nan kontan sajo (baco: nan sapayuang sapatagak), tapi tamasuak juo di dalamnyo nan indak kontan (baco: nan di bawah payuang di lingka cupak). Di dalam babarapo buku aja adaik Minangkabau, anak kamanakan nan sarupo iko diistilahkan jo kamanakan di bawah daguak, di bawah dado, di bawah pusek, di bawah lutuik.

Jikok wujuik tangguang jawaik Panghulu ko kito analogikan jo sabuah cupak. Mako, maurus anak kamanakan adolah cupak tatagak ataupun ragian takambang nan jadi padoman bagi surang Panghulu dalam manjalankan tugehnyo. Dalam hal iko, tabayanglah atau takristalkanlah kecek urang kini baraso kabasaran Panghulu ko tagantuang kapado kamampuannyo dalam maisi cupak nan tatagak atau ragian nan takambang nantun.

Namonyo kamampuan maisi cupak ataupun maniru ragian nan takambang, tantu ado cupak nan taisi panuah ka bawah, ado pulo nan cupak taisi panuah k ateh, ado pulo cupak nan balanjuang. Ado tiru nan tacoreang, ado tiru nan pas, ado pulo tiru nan kreatif sahinggo batambah manih manjalinok rononyo.

Kutiko cupak panuah ka bawah, lahialah Panghulu-Panghulu nan bacitra negatif. Ikolah Panghulu nan ketek nan dalam pameo diistilahkan jo “Panghulu Katuak-Katuak”, “Panghulu Kacang Miang”, dan lain sabagainyo. Kutiko cupak panuah sasuai ukurannyo, lahialah Panghulu nan bacitra positif. Ikolah Panghulu nan gadang, karano salasai urusan anak kamanakan dalam kaum (nan sapayuang sapatagak) dek inyo.

Salanjuiknyo, kutiko cupak balanjuang, tantu anak kamanakan di lua kaum (di bawah payuang di lingkuang cupak) mandapek kalimpahannyo. Aratinyo, nan sapayuang sapatagak salamaik, nan di bawah payuang di lingkuang cupakpun baitu, ikolah Panghulu nan basa. Untuak bisa manjadi  Panghulu nan basa, surang Panghulu indak cukuik jo kadudukan “gadang” dalam kaumnyo sajo. Dalam hal iko, dikatokan baraso Panghulu basa karano “padangnyo lapang alamnyo laweh”. Mukasuiknyo, ilmunyo tinggi wawasannyo lueh hatinyo lapang. Pandai bamain budi, dalam aia badan ndak basah.

Jikok tapakai gadang jo basa di ateh, mako dikatokanlah Panghulu nantun sabagai urang nan batuah. Karano, dengan sandirinyo anak kamanakan nan sapayuang sapatagak di bawah payuang di lingka cupak tadi lah manjadikan baliau ko contoh jo tuladan. Di dalam pituahnyo diibaraikkan jo ungkapan “baringin nan manangah koto, ureknyo tampek baselo, batangnyo tampek basanda, dahannyo tampek bagantuang, daunnyo tampek bataduah”. Untuak labiah jalehnyo, wilayah Gadang, Basa, Tuah Pangulu ko bisa digambarkan jo “core map” di bawah.

Pokok Kaji: Galeh    Tadah    Meja	:Kaum :Nagari :Minangkabau

Jikok galeh panuah dek kopi, aratinyo Pangulu salamaik manunaikan tugehnyo mamaliharo kaum. Itulah Pangulu nan gadang. Jikok isi galeh malimpah, tantu tadah dapek pulo marasokan manihnyo kopi. Aratinyo, itulah Pangulu nan basa.

Meja adolah tampek galeh, tadah barado. Aratinyo, Minangkabaulah nan maatur kadudukan katigonyo sacaro indak langsuang. Ikolah nan disabuik tuah, indak nanpak tapi adonyo bisa diraso. Jadi, tuah Pangulu adolah kadudukannyo nan alah digarihkan dalam adaik Minangkabau.

Salanjuiknyo, tantu ado parasaan kurang jikok referensi atau acuan tigo kato kunci, gadang, basa, tuah di ateh hanyo dihubuangan jo kamampuan baliau. Untuak itu, salanjuik kito urai pulo kabasaran nantun dalam hubungannyo jo wilayah kakuasaan baliau. Nan mano biaso dihubuangkan jo kato gadang nan sabingkah tanah, kabasaran nan salingka aua, tuah malingkuang Minangkabau. Tantangan itu, barikuik kito urai satu-parsatu.

Kato gadang mangacu kapado status kabasaran nan barasa dari nan kanduang sarato barang nan dikanduang.  Mako disabuik jo sabingkah tanah, yaitu anggota kaum jo pusakonyo.  Anggota kaum adolah “nan sapayuang sapatagak”, pusako kaum adolah tanah ulayat kaum nantun.  Di wilayah iko Panghulu adolah urang nan gadang sandirinyo.  Karano memang baliaulah nan dituokan, didahulukan salangkah ditinggikan sarantiang.  Karano itu pulo, baliau harus manampatkan diri layaknyo urang nan gadang dalam mandidik anak kamanakan anggota kaum.  Baliau mamiliki wewenang panuah untuak manindak sekaligus memiliki tangguang-jawab panuah taradok nan ditindak.

Adopun kato basa mangacu kapado kabasaran nan barasa dari lua nan kanduang jo di lua masalah barang nan dikanduang.  Yaitu, nan manjala karano cupak nan balanjuang. Istilah nan salingka aua mangacu kapado nagari.  Sabab, pado jaman saisuak, nagari dipaga jo aua ataupun jo parik rantang.  Jadi, basa ko bukan karano mananpakkan diri dengan sangajo ka lua kaum, tapi karano parasaan anak kamanakan di lua kaum tu. Biasonyo, basa ko identik jo ilmu panghulu nan digambarkan jo kato panghulu alamnyo laweh padannyo lapang. Talapeh dari faktor nan kanduang apolai barang nan dikanduang.

Tarakhir adolah kato tuah malingkuang Minangkabau. Iko adolah wilayah nan tabilang abstrak. Abstrak karano nan namonyo tuah adolah bukan sasuatu nan tasiraik, tapi sasuatu nan tasuruak, nan muncua sandirinyo sabagai refleksi dari gadang jo basa. Aratinyo, tuah ko manyangkuik kapado kabaradaan panghulu sabagai sosok nan jadi anutan bagi anak kamanakan.  Pendek kato, gadang adolah kabasaran panghulu nan nanpak, basa nan tasiraik, tuah nan tasuruak. Nan disuruakkan di dalam makna nan takanduang di pakaiannyo.