Pidato Pasamabahan Takziah I

Tumpuan Kato (Pihak Tamu/Ujuang)

Maa/mano baliau Angku.....

Juru Baso (Sipangka)

Manitahlah Angku.....

Tumpuan Kato (Pihak Tamu/Ujuang)

Sambah pulang bakeh Angku.....

Juru Baso (Sipangka)

Kapado Allah

Tumpuan Kato (Pihak Tamu/Ujuang)

Adopun sambah nan kadilalukan, iyolah tantangan sidang takziah nan lah datang ka rumah tanggo nanko;  ibaraik basukek rasolah panuah, umpamo babilang rasolah cukuik.  Samintaro manunggu tambahannyo, kok kito ansua-ansua sajo mangaji, kabak mano ko lah Angku....

Juru Baso (Sipangka)

Lah sampai tu Angku....

Tumpuan Kato (Pihak Tamu/Ujuang)

Bilang baitu lah sampainyo

Juru Baso (Sipangka)

Bilang lah sampai pituah Angku, dari ujuang sampai ka pangka, alah tateba ka nan rapek.  Tapi samantangpun baitu, dek kami duduak basamo, sabalah Angku sakutiko.

Tumpuan Kato (Pihak Tamu/Ujuang)

Basaba kami Angku

(Sipangka barundiang/ rapek ketek)

Juru Baso (Sipangka)

Maa baliau Angku....

Tumpuan Kato (Pihak Tamu/Ujuang)

Manitahlah Angku…..

Juru Baso (Sipangka)

Tantangan panitahan Angku....tadi, alah kami paiyokan jo baliau nan tuo sabalah pangka.  Pituah baliau ateh namo silang nan bapangka karajo nan bapokok tantangan panitahan Angku nantun; jikok kurang laweh tapak tangan, jo niru kami tampuankan. Sakian Angku...

Tumpuan Kato (Pihak Tamu/Ujuang)

Mandanga pituah Angku....sanang rasonyo kiro-kiro.  Dek sabab karano itu, kito mintakan sajo ka nan lai, kito sandakan sajo ka nan gadang Angku....

(Siak mulai mangaji, tahlilan, doa, janang manatiang)

Juru Baso (Sipangka)

Maa baliau Angku....

Tumpuan Kato (Pihak Tamu/Ujuang)

Manitahlah Angku....

Juru Baso (Sipangka)

Adopun titahan nan ka disampaikan, iyolah tantangan hidangan nan ka tangah; nan balirik di ruang tapi, nan manjambo hinggo ka tangah.  Bakato rajo janang kami, ibaraik barituang rasolah cukuik, babilang raso lah ganok.  Namun samantang pun baitu, dek banyak inyo kok ragu dek lamo inyo kok lupo.  Layangkan lah pandangan ka nan jauah, tukiakkanlah pandangan ka nan ampiang, kok ado kurang nan mungkin ditukuak, sentiang nan mungkin dibilai.

Tumpuan Kato (Pihak Tamu/Ujuang)

Lah sampai tu Angku…

Juru Baso (Sipangka)

Bilang baitu lah sampainyo

Tumpuan Kato (Pihak Tamu/Ujuang)

Tantangan pituah Angku nantun, nak siang bak hari nak tarang bak bulan, basaba lah Angku sakutiko.

(Pihak ujuang barundiang/ rapek ketek)

Tumpuan Kato (Pihak Tamu/Ujuang)

Maa baliau Angku.....

Juru Baso (Sipangka)

Manitahlah Angku....

Tumpuan Kato (Pihak Tamu/Ujuang)

Tantangan panitahan rajo janang tadi, alah kami layangkan pandangan ka nan jauh, tukiakkan pandangan ka nan ampiang.  Kurang ndak ado nan ka ditukuak, senteang ndak ado nan ka dibilai.  Hanyo sajo, dek putuih kato di pangkanyo, iyo sifaik nan kami tunggu mah Angku...

Juru Baso (Sipangka)

Kok sifaik nan Angku mintak, nak kami mulai jo bismillah, turuik dek Angku basamo-samo.

(Minum)

Tumpuan Kato (Pihak Tamu/Ujuang)

Maa baliau Angku....

Juru Baso (Sipangka)

Manitahlah Angku.....

Tumpuan Kato (Pihak Tamu/Ujuang)

Tantangan minum kami, ibaraik lukah nan lah panuah, umpamo injok nan lah sasak, mambangkik kami ndak tau.../ibaraik golek lah tibo din an data, ndak namuah bajalan lai.

Juru Baso (Sipangka)

Kok coitu, kito sarahkan sajo ka nan manahan Lah Angku..../samo-samo baranti se kito Angku…

(Janang mambangkik galeh)

Tumpuan Kato (Pihak Tamu/Ujuang)

Maa baliau Angku.....

Juru Baso (Sipangka)

Manitahlah Angku....

Tumpuan Kato (Pihak Tamu/Ujuang)

Adopun pasambahan nan kadipulangkan bakek Angku iyolah tantangan karajo kito nan samalam ko. Jikok dirunuak manuruik pasa nan biaso, raso lah salamaik samparono.  Lah dimulai jo fatihah, ayaik, sarato ditutuik nan jo doa.  Mudah-mudahan almarhum/mah nan lah mandahului kito mandapek kabarkahan, kok sulik dapeklah kamudahan, kok sampik dapeklah kalapangan. Kapado sagalo sanak sudaro nan ditinggakan, dakeklah ka katabahan dan dibari kakuatan. Salanjuiknyo, tantangan kami sidang takziah, kok tibo lah baduduakkan, minum rasolah pueh/makan rasolah kanyang.  Karano karajo lah salamaik samparono, kami nak mintak ijin, pulang ka rumah masiang-masiang. Sakian, sambah dipulangkan ka bakeh Angku....

Juru Baso (Sipangka)

Lah sampai tu Angku...

Tumpuan Kato (Pihak Tamu/Ujuang)

Bilang baitu lah sampainyo..

Juru Baso (Sipangka)

Sapanjang pituah Angku tadi, itulah kato sabananyo.  Tapi di baliak pambalakangan itu, dek kami ateh namo silang nan bapangka karajo nan bapokok; tantangan almarhum/mah samaso hiduik, kok ado capek kaki nan talangkahan, ringan tangan nan tajangkauan, silaf lidah nan kalampauan.  Baiak nan sangajo ataupun tido, kami nak mintak pamaafan malalui saluruh sidang takziah nan tatumbuak ka bakeh badan diri Angku.....ka bak mano tu Angku....

Tumpuan Kato (Pihak Tamu/Ujuang)

Dek kami ateh namo sagalo sidang takziah, sabalum kaki dilangkahkan tangan diayunkan manuju rumah tanggo nanko.  Lah taniaik di dalam hati untuak basadakah kaji sarato doa kapado almarhum/mah sarato sanak sudaro nan ditinggakan. Dek sabab karano itu, sarantak jo ayunan tangan jo langkah kaki, lah baluluah sagalo salah sarato gawa jo karilaan dan pamaafan.  Baitu juo sabaliaknyo, kok ado salah jo gawa dari kami ateh namo sidang takziah, kami nak mintak maaf jo karilaan pulo kapado silang nan bapangka karajo nan bapokok malalui Angku....

Juru Baso (Sipangka)

Kok lah bahimpun rila jo maaf, lah sanang pulo hati kami.  Baatu nyo kini, tantangan mintak Angku, ka kami lapeh sajo jo hati nan suci muko nan janiah mah Angku....Hanyo sajo, nan barisuak, barami-rami juolah Angku kamari.

Tumpuan Kato (Pihak Tamu/Ujuang)

Kok barisuak, maa nan mawujuik, tarimo sajo dek Angku.....mah. Nan kini, jo salam se kami maurak selo mah Angku....Assalamualaikum....

Juru Baso (Sipangka)

Waalaikumussalam....