(13) Eeh, Ka Siko Pulo Ang Yo!

Hari ko, pagi-pagi sangaik, jo sumangaik 45 Udin barangkek manuju rumah sakola. Lah bulek hati Udin nak manamui salah surang dosen panguji ujian skripsinyo. Maklum, si Mirna lah mandasak. Jadi, pado cinto basiarak, elok lah dosen ko awak dasak, pikia Udin kutiko itu.  

Satibo di kampus, Udin langsuang maambiak duduak tapek di muko ruangan dosen nantun. Di sampiangnyo, nampak surang laki-laki nan sadang duduak lamak sambia sibuk mambaco buku. Yo ancak palangkahan pagi ko, ado kawan, pasti nio bimbingan juo, gumam Udin dalam hati sambia mancaliak laki-laki di sampingnyo tu jo suduik mato.

Sasudah sapuluah minik balalu, Udin nampak mulai rasah. Untuang akanyo lai ndak hilang. Makonyo, pado mono, elok diajak kawan sabalah ko maota, pikia Udin sambia mamuta utak mancari strategi mamanciang paratian laki-laki ko. 

"Maaf, ado pena?", tanyo Udin babaso-basi.
Laki-laki nan ditanyo ko malengah mancaliak Udin sabanta lalu manyodorkan tangannyo maagiahan pena.

"Ado, ko ha" jaweknyo santai.

Sasudah asa-asa mancoret saketek di kotak rokok nan nyo pacik, Udinpun langsuang mambaliakan pena ka ampunyo. Kutiko itu, laki-laki ko langsuang mananyoi Udin.

"Ka bimbingan skripsi?"

"Indak. Manamui panguji. Tapi dosen ko alun juo tibo lai" jawek Udin agak mangaluah.

"Sia dosennyo?" lanjuik laki-laki ko.

"Pak Dadang, ang?" Udin langsuang manjawek, lalu baliak batanyo.

"Ohhhh, samo mah" balehnyo sambia maangguak-anguak balam.

Mancaliak angguak ko, Udin langsuang maraso dapek kawan. Sambia agak manggarutu, Udinpun melanjuikan.

"Gaek ko nampak bana pantang diharok, mintak dituruik lo ka rumahnyo kali mah" umpek Udin sarupo urang mangecek jo diri surang tapi jaleh kadangaran.

Mandanga keluhan Udin ko, kawan barunyo ko langsuang marespon patando satuju.

"Ancak mah, tu alamatnyo ado di papan tulih tu ha" keceknyo sambia manunjuak ka papan tulih nan tagantuang indak jauah dari tampek mereka duduak.

Udin maangguak ketek, lalu bajalan mangikuti arah tunjuak kawan baru ko mancari alamaik dosen panguji ujian skripsinyo, Pak Dadang. Manga manunggu lamo-lamo di siko, elok dituruik se sore beko ka rumahnyo lai, gumam Udin sambia mahafakan alamaik Apak tu.

Sore harinyo, Udin tapaso mangensel janji nan lah tabuek jo si Mirna, ceweknyo nan kamek. Iko urusan kuliah ko, jadi urusan cinto musti bisa mangalah salangkah. Babaka tekad bulek ko, Udin akhianyo berhasil manamukan alamaik nan nyo cari.

Kabatulan bana, kutiko itu, di muko rumah nan nyo tuju sadang ado cewek kamek nan sibuk manyapu-nyapu teras. 

"Assalamu alaikum" salam Udin layaknyo urang batamu.

"Waalaikumus salam" baleh cewek ko sambia senyum. 

Ondeh mande, mati den, manih senyum nyo laiiii, gumam Udin dalam hati. Ko pasti anak Apak ko mah, pikianyo. Lalu, Udinpun langsuang manyampaikan niaiknyo.

"Maaf Ni, wak mncari Pak Dadang. Apak ado?" lanjuik Udin sambia marunduak lagak laki-laki nan sopan minta ampun.

Mancaliak gelagat Udin nan nampak agak pamalu ko, cewek ko langsuang indak cangguang baramah-tamah.

"Duduaklah Da, Apa barusan ka kadai sabanta mancari rokok. Kecek baliau kalau ado mahasiswa atau sia sajo nan mancari, suruah tunggu se sabanta" urai cewek ko panjang leba, lalu bajalan ka dalam malatakan sapunyo.

“Yes”, mudah-mudahan Apak ko lamo tibonyo. Jadi wakden bisa maoleh anaknyo ko. Pangana jahiliah Udin langsuang bakarajo baitu ikuonyo tacacah di kursi di teras muko.

Tarago inyo mancari aka untuak maolah cewek ko, tibo-tibo di muko paga inyo manampak urang nan raso-raso nyo kenali. Halah, kawan tadi mah, lah tibo pulo nyo di siko, pikia Udin lalu tagak sambia mahariak.

"Hoi, kawan, ka siko lo ang yo?" sapo Udin lantang sambia mangangkek tangan maagiah kode.

"Iyo lah, wakden kan memang tingga di siko, ko baru baliak mambali rokok. Lah lamo kawan?" balehnyo cuek bajalan malewati Udin.

Udin tibo-tibo sajo jadi tagugu, muluiknyo tangango, di muko kaniangnyo raso-raso ado bintang nan baputa-puta. 

"Ha? plakkk" Udin langsuang manapuak pangka kaniangnyo nan tibo-tibo sajo lah basah dek paluah. (Ide: EG).