Pidato Pasambahan Mambukak Balabeh

Disabuik pasambahan mambukak balabeh bukan karano ado hubungannyo jo tantangan silek sabagai bela diri. Samato, sabagai palamak kato kutiko mambukak pambicaraan sarupo urang basilek lidah.

Balabeh I

Juru Baso (Sipangka)

Sambah dianjuang kiri kanan, kapado sagalo Datuak-Datuak, Alim Ulama, Cadiak Pandai. Indak basibak jo basisieh, indak bahinggo jo babateh, khususnyo kapado Datuak surang. Sabab ka Datuak sambah dipulangkan; ibaraiknyo badan diri Datuak; kayu gadang nan manangah koto, nan baurek limbago matan, nan babatang sandi andiko. Badahan cupak jo gantang, barantiang mungkin jo patuik. Nan badaun rimbun jo adaik, babuah kato nan bana, babungo alua jo patuik. Bakek baselo di ureknyo, tampek basanda di batangnyo. Hari hujan tampek bataduah, hari paneh tampek balinduang. Tampek nan mudo sanda gurau, tampek nan tuo main catua, tampek alim main kitab. Gantungan cupak nan duo; partamo cupak usali, kaduo cupak buatan. Nan dikatokan cupak usali; nan sakundi-kundinyo, nan sabantiang tali bajak, kupang jo ameh langkok pulo, barek nan 12 taia. Dikikih baabih basi, dibasuah baabih aia. Indak lakang karano paneh, indak lapuak karano hujan. Nan dikatokan cupak buatan; batapuang kapua jo sadah, balilik pinang jo gambia. Saiyo mangkoknyo namuah, sapakaik mangkok manjadi. Baatunyo kini, iyolah sapakaik pulo kami nan di pangka baraso nan ka jadi tumpuan kato iyolah Datuak. Sabab, dek kami Datuak ibarek batu ka bakek duduak, ibarek tunggua ka bakek tagak, umpamo batang bakek basanda. Nak sasuai jo pituah Minang; kato datang dipamole/ pamolah, sambah lalu ditarimo. Yo tarimo di Datuak baiak-baiak mah.

Balabeh II

Juru Baso (Sipangka)

Sungguahpun Angku surang nan dihadang jo pasambahan, tagah dihimbau nan sakali. Disambah pulolah sagalo Angku-Angku dari pangka sampai ka ujuang, dari tangah lalu ka tapi. Di atehnyo Niniak jo Mamak Nan Gadang Basa Batuah. Gadang nan sabingka tanah, kabasaran nan salingka aua, tuah malingkuang Minangkabau. Ka pai tampek batanyo, ka pulang tampek babarito. Aie janieh sayaknyo landai, mansucikan lahie jo batin. Indak  manyimpang pado syara^’, taguah  bapagang jo adaiknyo. Katupek baok balayia, baok kasampan ka limonyo, takilek ikan di dalam aia, lah tantu jantan batinonyo. Baitu Jauhari Datuak kito. Kamudian dari pado itu, kapado alim jo ulama, fakiah jo fukaha, nan kamanunjuak maaja ka nan baiak, managah malarang ka nan munkia. Camin nan indak namuah kabuik, palito nan indak namuah padam. Salamo bukik ditampuah angin, lurah ditampuah aia. Ka unduang-unduang ka Madinah, ka payuang panji ka sarugo. Salanjuiknyo, kapado mudo nan bakakak rapek nan bakapalo, parik paga dalam nagari. Panjang tasandang di ateh bahu, barek  tanjunjuang di kapalo, ringan tajenjeng nan jo jari. Rusuah agamo kok ka rusak, adaik  limbago kok ka binaso, parik rantang kok ka taereng, Indak mangana jarieh jo payah asa nagari lai salamaik. Barikuiknyo, kapado urang tuo nan saundang-undang, ka pai tampek batanyo, ka pulang tampek babarito. Ka tampek alim main kitab, bakek nan cadiak main undang. Lalu, urang banyak nan saedaran, duduak nan sahamparan, nan saadaik salimbago. Dan di dalam pasambahan ambo juo, Bundokanduang samo di dalam. Nan mamacik kunci bunian, Lumbuang Nagari kato adaik. Jo salam sambah disampaikan.

Balabeh III

Juru Baso (Sipangka)

Taantak puntiang ka hulu, di bawah kiliran taji. Asa mulo kato dahulu, tigo limbago nan tajali. Partamo sambah-manyambah, kaduo baso jo basi, katigo siriah jo pinang. Sambah-manyambah dalam adaik, tali-batali undang-undang. Nan tasabuik di muluik manih, nan tapakai di baso baiak. Muluik manih talempong kato, baso baiak gulo di bibia. Di dalam bungka nan piawai, banamo adaik sopan santun. Nyato limbago nan tajali, isinyo adaik jo pusako, basamo kito mamakaikan. Sajak barajo nan usali sampai sakarang kini nanko, adaik pidato disambahkan, alun sudah janjang lah tagok, kok patah baru dikumpa – nak samo dibuhua mati.  Falsafah adaik Minangkabau mangatokan: adaik basandi syara', syara' basandi kitabullah. Syarak mangato adaik mamakai. Bana manuruik syara’, luruih manuruik adaik. Di syara’ babilang lazim, di adaik bakato kawi. Makonyo, Panghulu dikatokan saandiko, alim saagamo. Abih tahun baganti musim, namun nan bana indak dilampaui. Satantang jo itu julo, ado babarapo pakaro nan kaambo banakan bakek Angku, yaitunyo tantangan badan diri Ambo, nan kamalelokan sapanjang adai, iyo di dalam alek nanko. Ibaraiknyo biduak kaciak nan baru sudah, pakakeh nan alun langkok bana, kok balayia manapi-napi, bakato dibawah-bawah. Ka tangah takuik dek galombang, ka tapi takuik dek buayo. Kok barubah lawanan sapo, batuka lawanan ansak, manuruik alua jo patuik. Kalilawa di pulau rambang, anak ruso mati badabieh. Kok gawa dapek ditimbang, kok doso ampun nan labiah. Kok ado khilaf jo gawa, sakali gawa baribu ampun. Sakian sambah disampaikan.

Balabeh IV

Juru Baso (Sipangka)

Sikaduduak di ateh parik, sarumpun jo bilang-bilang. Manolah sagalo Angku nan duduak balirik, indak ka Ambo atok indak ka Ambo bilang. Di atehnyo Niniak jo Mamak, Alim jo Ulama, Pakieh jo Fukaha^’.Gadang nan bakabasaran, Kayo nan bakamoleran. Indak kadisabuikkan namo ka dipanggiakan gala. Disabuik namo bak raso ndak katantu, dipanggiakan gala bak raso ndak kaabeh. Lah tantu bana namo sagalo angku-angku, bak raso kasalah sabuik ambo jadinyo. Maklum Alim banyak nan kiramaik, Panghulu banyak nan batuah. Malantiang nak manuju tampuak, nak ditantang buah nan ka lareh. Yo kapado Angkulah sambah dipulangkan.