Thursday, April 26, 2012

Pidato Pasambahan Sabalun Makan


Juru Baso (Sipangka)
Dikanang maso dahulu, disabuik musim panambai, samaso padi di rangkiang. Dijamua dek si Kambang Manih baduo jo si Kambang Aluih. Hari paneh jamua takaka, masiak sasinga paneh patang. Ditumbuak padi di kincia, diindang ditampi-tampi, hinggo atah tasisiah juo. Ditanak jo tungku duo, disulo jo puntuang rokok. Baatunyo kini, kok padi lah jadi bareh, nasi lah jadi hidangan, lah tibo di hadapan kito basamo. Manuruik kato si rajo janang; lah rato cukuik kasadonyo. Alah sabarih jamba nan tahidang, dari pangka sampai ka ujuang, dari tangah lalu ka tapi, manjamba ka ruang gadang.  Ibaraik basukek rasolah panuah, umpamo babilang rasolah cukuik. Tapi samantangpun baitu, kok ado lirik nan talampau, kok ado kurang nan ka ditukuak, senteang nan ka dibilai. Yo layangkanlah dek Angku pandangan ka nan jauh, tukuikkanlah ka nan ampiang, samintaro janang lai tagak juo. Bak pituah Datuak juo; tuan Katik mangarang bandua, takarang di banang balang. Sungguahpun cukuik dari dapua, tibo di ujuang antah kurang.
Tumpuan Kato (Pihak Tamu/Ujuang)
Sapanjang panitahan Angku tadi, tantangan juadah nan ka tangah; lah elok liriknyo bak batanam, ancak susunnyo bak mamarik.  Dek mato kami nan mancaliak; ibaraik bungo lah jadi putiak, putiak lah suko jadi buah, buah lah masak ranum pulo. Tenggih bak raso kadijuluak, randah bak raso kadijangkau. Dijuluak bak raso ka rasan pisau, dijangkau izin nan balun. Jadi, tapaso binanti jatuah dari tampuak mah Angku, sakian sambah di pulangkan ka bakeh Angku.
Opsi Lain
Tumpuan Kato (Pihak Tamu/Ujuang)
Tantangan juadah nan ka tangah; indak ado kurang nan makanan tukuak, sentiang nan makanan bilai. Tapi, sungguahpun baitu, ibaraik urang manabang kayu, dek Angku nan dipangka, tabanglah dek Angku dari sinan, nan kami sisiak dari siko.
Juru Baso (Sipangka)
Mandangan pituah Angku, sanang rasonyo kiro-kiro.  Baa tu nyo kini; disikek luluak nan lunak, ditanam padi di sawah, dituai basamo-samo. Jikok sifaik nan Angku mintak, nak kami mulai jo bismillah, turuik dek Angku basamo-samo.
Opsi Lain
Juru Baso (Sipangka)
Pulau Aia Lubuak Kilangan-pandan sapanjang muaronyo, ambiak aia basuahlah tangan, rasaki samo-samo kito tarimo.

8 comments:

  1. Pasambahan Malewakan gala lai ado tu mak?

    ReplyDelete
  2. Ado Pak. ko link nyo http://hendrizalman.blogspot.com/2012/04/pidato-batagak-gala.html. Hanyo sajo, sangajo indak ambo buek ditailnyo, karano bantuak palaksanaanyo tantu manuruik jinih apokoh di daerah takaik manggunokan jinih pidato pasambahan alua atau pidato pasambahan pamolah. Sudah tu, teknisnyo tantu disasuaikan jo adaik salingka nagari.

    ReplyDelete
  3. This comment has been removed by the author.

    ReplyDelete
  4. samo-samo Pak, insyaallh nantik ambo silau-silau blognyo

    ReplyDelete
  5. Ambo dapek di kampuang, di Batubanyak, Solok, Sanak. Namun, manuruik surang Tuo Randai (Mak Katik), pasambahan ko barasa dari daerah Batu Sangka.

    ReplyDelete