Etika Alek, Baradaik Minangkabau “Analisis Pidato Pasambahan Adaik Minangkabau”

Assalamualaikum warahmatullahi wa barakatuh.

Sabalun isi kato buah rundingan dikatangahkan, ambo manyaru kapado Allah, maminta sagalo tuntunan, supayo didakekkan ka nan bana, dijauhan dari sagalo kakhilafan.  Kok ndak dapek nan baitu, dibukaan juolah pintu ampunan, bia nak jan bungkuak pungguang dek baban, bundo lah seso manggadangan. Amin.

Salanjuiknyo, kapado dunsanak ka sadonyo ambo banakan, aluran badan diri ambo hanyolah biduak ketek nan baru sudah, pakakeh nan alun langkok bana.  Kok balayia manapi-napi, bakato di bawah-bawah, sabab ka tangah takuik dek galombang, ka tapi takuik dek buayo.  Hanyo sajo, dek kabanaran butuah pambandiang, alua butuah pamatuik, indak dogmatis cando saisuak, ambo baranikan diri maadu untuang.  Pintak ambo, kok barubah lawanan sapo, batuka lawanan asak, manuruik alua jo patuik.  Akhianyo, jo salam di muko, sambah ambo sampaikan,

Salah satu ciri caro baradaik dalam acara baradaik di Minangkabau, iyolah pasambahan jo pidato adaik.   Salah satu mamangan pambuka pasambahan nan cukuik tanamo iyolah:

“Tahantak puntiang ka hulu, di bawah kiliran taji, asa mulo kato dahulu, tigo limbago nan tajali. Partamo sambah-manyambah, kaduo baso jo basi,  katigo siriah jo pinang… Nyato limbago nan tajali, basamo kito mamakaikan, nan lah tarupo manjadi adaik, elok lah jadi pakaian, di dalam adaik Minangkabau”.

Dari mamangan di ateh, dapek sakironyo dipahami, baraso sabalun karajo ka dikakok, ado hal nan harus diparatian, ikolah satidaknyo nan disirekkan dek ungkapan “asa mulo kato dahulu, tigo limbago nan tajali”.  Dimano, katigo limbago nan tajali ko marupokan langkah bakasinambungan nan indak buliah dipaliang apolagi diungkai, mako tasabuiklah Alua Nan Tigo, alua nan ka dituruik, limbago nan ka dituang, cupak nan ka diisi, ragian nan ka ditiru.  Alua Nan Tigo nantun iolah Alua Syara’, Alua Adaik, sarato jo Alua Pamarintahan.  Khususnyo bagi kito urang nan baradaik Minangkabau, kabaradoan nan iko ko, pado hakikaiknyo adolah sajalan jo istilah Tungku Nan Tigo Sajarangan, atau Tali Nan Tigo Sapilin (syarak’, adaik, pamarintahan).  Dalam konteks mamangan ko, nan tigo tu iyolah nan disabuik jo sambah-manyambah (1), baso jo basi (2), sarato siriah jo pinang (3).

Sambah-manyambah maajaan kapado kito tantang duo hal, nan partamo manyaru dan basarah diri kapado Allah, nan kaduo manunjuakkan panghormatan kapado saluruah urang Minangkabau sacaro umum, dan sagalo pihak nan takaik pado khususnyo.  Ruponyo tantu jo baiyo batido ataupun barila-rila jo sagalo pihak nan takaik.  Sadangkan nan kaduo (2), baso jo basi kapado sagalo pihak nan takaik jo parmasalahan nan ka diangkek, dirupoan dalam bantuak manyampaikan nan taraso (wacana) sarato mambana ateh namo diri, niaik sarato mamintak patunjuak.  Tarakhir nan katigo (3) siriah jo pinang, mukasuiknyo iolah manunjuakan kapado masyarakaik baraso payuang alah sakaki, tali nan tigo alah sapilin, alua nan tigo alah sajalan.  Sasudah tu, barulah karajo dikakok, lalu dikatangahkan ka masyarakaik nan jamak, ka labuah nan golong, ka pasa nan rami. 

Makonyo, sasuai jo istilah Alua Nan Tigo dalam pidato pasambahan adaik di ateh, sabalum karajo dikakok, kato diteba ka nan rami, supayo niaik tantangan adaik tatampuah caro baradaik, kito musti talabiah dahulu manampuah Alua Nan Tigo nantun. Tantunyo jo baiyo-batido jo pangampu alua nantun.  Iko lah tampeknyo Tungku Nan Tigo Sajarangan dalam konteks karajo, dinyatoan dalam bantuak standar karajo; ukua-jangko, raso-preso, alua-patuik.  Ikolah nan kamudian tarupo manjadi adaik, nan elok jadi pakaian, dalam kaidah baradaik di Minagkabau.  Jikok alua ko lai ditampuah, insya Allah karajo akan dimungkinkan.  Jikok ndak ditampuah nan baitu, mamangan lain mangatokan; ditahan lukah di banda, ditahan dibangkik-bangkik, ditulak alua nan bana, ubek jadi panyakik.  Karano itu, ndak salah banyak niaik baiak sakalipun barujuang jadi buruak, ndak batarimo di nan rami.  Indakkah kito mamahami, baraso lah jadi pameo nan baiko; niaik mambangun musajik, jadinyo malah….

Akhianyo, sungguahpun indak manih saroman tabu, mudah-mudahan lai indak tibarau sajo kasadonyo.  Kok lai ado nan boneh, tolonglah naikkan ka ateh rangkiang, kok ampo sansai sajo nan tasuo, campakanlah ka sarok laman.  Di balakang ambo baharok, kok indak ka jadi pamenan dek Sutan-Sutan, atau jadi pahangek lalok dek si Buyuang, bialah jadi rasaki ayam.  Jo salam ambo akhiri pasambahan, assalamu alaikum wa rahmatullahi wa barakatuh.