Surambi
Musyawarah I
Tumpuan Kato (Pihak Tamu/Ujuang)
Sapanjang panitahan Angku tadi
dari pangka sampai ka ujuang, alah tateba ka nan rapek. Elok kato lah
dilega buni, elok sirih lah dilega carano. Manolah nan pituah dari Angku,
iyolah tantangan diri Angku, nan ka manjadi kalifah nan kadim wakia nan mutlak.
Ka manyampaikan kato malalukan rundingan, nan tatumbuak ka badan diri ambo.
Alahkah manuruik alua jo patuik. Kan baitu Angku....?
Juru Baso (Sipangka)
Bana Angku....
Tapi samantang pun baitu, bak pituah
Angku juo; badeta hitam
batatak, bacawek salillik pinggang, baserong si bugih lamo. Nan lai tampek
mamintak, nan kayo tampek batenggang, nan tuo tampek batanyo. Karano kami
lai duduak jo nan tuo, sabalah Angku sakutiko.
Juru Baso (Sipangka)
Basaba kami Angku.
Tumpuan Kato (Pihak Tamu/Ujuang)
Tantangan pasambahan Angku tadi, alah
kami paiyokan jo baliau-baliau nan tuo. Nan jadi titahan dek baliau
mandanga pasambahan Angku; lah bak cincin lakek di jari, lah bak ukia lakek di
papan. Dek sabab karano itu, palalukan bana lah dek Angku. Dek
kami; ka kami sandaan sajo pado nan gadang, kami sarahkan sajo pado nan
pandai. Jikok kurang laweh tapak tangan, jo nyiru kami tampuangkan.
Musyawarah II
Tumpuan Kato (Pihak Tamu/Ujuang) atau Juru Baso (Sipangka)
Sapanjang pituah Angku tadi; dipaliang
umpamo cincin, dikisa ibarek galang, bantuak lah dimakan siku-siku. Jikok
luruih lah manahan tiliak, balabeh lah manahan cubo. Tapi samantangpun baitu,
karano kamuliaan kapa ba Nakodoh, rumah ba Tunganai, Rundiangan ba nan
tuo. Iyo basaba Angku sakutiko; ibaraik urang mangayia; duduak bamanuang
tapi aia, gilo dilamun-lamun ombak, kaia putuih palampuang pun hanyuik.
Samintaro tangan ka kumparan, tinggalah Angku jo rundingan mah.
Tumpuan Kato (Pihak Tamu/Ujuang) atau Juru Baso (Sipangka)
Tantangan pasambahan Angku tadi; alah kami
rambuakkan basamo-samo. Lah kami carikon kato nan sapakaik, rundingan nan
saiyo. Dek kami; pasambahan Angku tadi lah bak punco masuak ka hulu,
itulah kato sabananyo. Dek sabab karano itu, palalukan bana lah dek
Angku, buni nak buliah samo-samo kito danga, rupo nak samo-samo kito liek.
No comments:
Post a Comment