Lalok Sakalok Barasian, Langkah Salangkah Ganjua Suruik (Tanggapan terhadap KKM 2010)

Assalamualaikum warahmatullahi wa barakatuh.

Sabalun isi kato buah rundingan dikatangahkan, ambo manyaru kapado Allah, maminta sagalo tuntunan, supayo didakekkan ka nan bana, dijauhan dari sagalo kakhilafan.  Kok ndak dapek nan baitu, dibukaan juolah pintu ampunan, bia nak jan bungkuak pungguang dek baban, bundo lah seso manggadangan. Amin.  Salanjuiknyo, kapado dunsanak ka sadonyo ambo banakan, aluran badan diri ambo hanyolah biduak ketek nan baru sudah, pakakeh nan alun langkok bana.  Kok balayia manapi-napi, bakato di bawah-bawah, sabab ka tangah takuik dek galombang, ka tapi takuik dek buayo.  Hanyo sajo, dek kabanaran butuah pambandiang, alua butuah pamatuik, indak dogmatis cando saisuak, ambo baranikan diri maadu untuang. Sambia bagulambek, Ambo pabulek alu pangali, indak nan labiah dari puntuang, ambo pakuaik hati nurani, indak nan labiah dari untuang. Walau ka angok-angok ikan, bogo ka nyawo-nyawo patuang.  Pintak ambo, kok barubah lawanan sapo, batuka lawanan asak, manuruik alua jo patuik.  Akhianyo, jo salam di muko, sambah ambo sampaikan, tando tacinto bajawek tangan, antah ka ganti rokok nan sabatang, ataupun siriah nan sakapua.

Babarapo pakan nan sudah, ambo mandapek kaba dari kampuang, “bana-bana hotnews” baitu si tukang kaba mamulainyo.  Kutiko ambo tanyo kalanjutannyo, jawaban baliau “urang rantau (Gebu Minang) ka maadoan Kongres Kebudayaan Minangkabau 2010 (KKM 2010), di antaro topik nan kadiangkek; tasabuiklah pangukuhan jo deklarasi Adaik Basandi Syarak, Syarak Basandi Kitabullah (ABS-SBK), maadoan limbago Tungku Tigo Sajarangan, Majelis Adaik dan Syarak (MAS) sebagai majelis musyawarah informal, nan ado mulai dari tingkek Nagari, Kecamatan, Kabupaten/ Kota, Propinsi, dan Pusat”.  Mandanga kaba nangko, ambo langsuang takana jo niniak-niniak nan maindang-manampi bareh, nan mamiliah atah ciek-ciek, nan manggantuangan ka tiang tuo.  Nan mancancang jo malatiah, nan marimbo jo marayo, nan mambukak sawah jo ladang, nan mambuek banda buatan.  Sawah lah langkok jo lantaknyo, ladang  lah langkok jo ranjinyo, banda lah langkok jo buatan.

Namun samantangpun baitu, supayo nak siang bak hari, nak tarang bak bulan, ambo carilah info tantangan itu.  Satalah bunyi didanga rupo dicaliak, nyato batamu ambo jo babarapo hal nan bana-bana jangga, atau sumbang caro dulunyo, baitu pituah nan ditarimo.  Dan di antaro parihal nan sumbang nantun, kaduo topik nan dikatangahan tukang kaba ambo di muko tadilah, nan manuruik pamahaman ambo paliang sumbang di talingo, di mato, apolai di kiro-kiro.  Di sampiang itu, mandanga munculnyo panolakan dari Budayawan Sumbar, selain sumbang sacaro materi, ambo pun mansinyalia ado etika alek (baco: acara adaik) nan talangga.  Sahinggo, wajarlah manuruik ambo gerakan nan manyarukan panolakan taradok karajo nangko makin manjadi.  Karano ambo sandiri marasoan, danguang acara ko lah bak bunyi rang manutuah baringin koto, mangguncang rumah nan gadang, manggarakkan tiang ka tujuahnyo.  Nan ambo takuikan, kok mandanguang lauik Sailan, bakumpa karang ka tapi, apo ka dayo juru mudi.

Barikuik tanggapan ambo tantangan kaduo topik di ateh sarato babarapo prediksi pribadi.

A. Tanggapan

1.    Deklarasi Adaik Basandi Syarak, Syarak Basandi Kitabullah (ABS-SBK)

Di dalam sajarah Minangkabau, walaupun labiah basifaik historiografi, alah disapakati baraso ABS-SBK ko alah dideklarasikan dek niniak moyang kito di Bukik Maropalam.  Di dalam pidato adaik dikatokan;

"…….Di Bukik Maropalam – di dalam Luhak Tanah Data – di galanggang nan barajok di medan nan bapaneh – di sinan lah duduak Datuak Katumangguangan – jo  Datuak Parpatiah Nan Sabatang – langkok jo Basa Ampek Balai – sarato Niniek jo Mamak – Alim Ulama jo Tuangku. Mancari kato nan sapakaik – rundiangan nan saiyo – iyo di alam Minangkabau – bulek lah buliah digolongkan – picak lah jaleh dilayangkan – jikok bulek indak basuduik – picak indak basandiang – nan dikatokan jo kaidah – al adatu la yanfashilu bis syar’i, was syar’I la yanfashilu bil adati, walau kanat munfashilan, kanat bathilan ……..”.

Sanada jo pidato adaik di ateh, Angku Yus Datuak Parpatiah malalui Balerong Jakarta, manambahkan di dalam kasetnyo, baraso di sampiang unsur nan tasabuik dalam pidato adaik nantun, deklarasi ABS-SBK di Bukik Maropalam juo dihadiri oleh Mudo Nan Bakakak Rapek Nan Bakapalo – Parik Paga dalam Nagari.  Baliaupun manjalehan baraso unsur Parik Paga ko diwakili oleh tokoh-tokoh nan dikanali sabagai Harimau Nan Salapan.  Dan kalau ambo indak silaf, Tuanku Nan Renceh sarato jo guru baliau Tuanku Tuo Cangkiang (1723-1830) adolah anggota dari Harimau Nan Salapan ko nan cukuik vokal.  Dari siko pulo ambo bapandapek, baraso informasi KKM 2010 saputaran sajarah Bukik Maropalam ko, taraso kurang tapek, salah latak bak pakalang.  Tapi sungguahpun baitu, tantangan iko ko, rasonyo ndak paralu dipamasalahan bana.

Kamudian nan daripado itu, tantangan deklarasi ABS-SBK ko, ambo raso bukanlah karajo nan bijaksano.  Manga sabab mangko baitu? Karano iko adolah falsafah hiduik nan paliang mandasar nan bafungsi sabagai pangontrol falsafah tatuo “alam takambang jadi guru”.  Falsafah bukanlah materi nan bisa dihafalkan, disimpan dalam kapalo, lalu diturunkan malalui pangajaran baitu sajo.  Falsafah adolah kearifan nan sangaik arek kaitannyo jo hati dan raso.  Dan raso hanyo bisa didapek dek urang nan gadang jo materi pancipta raso, jo suasana pamanciang raso, paliang indak, hiduik badampiangan jo raso nantun.  Artinyo, maa mungkin urang nan dalam kasahariannyo mamakai kato “om” taradok dunsanak ibunyo, atau paliang indak nan hiduik di lingkungan nan sarupo itu, ka paham jo raso “bamamak”, apolagi maajaan urang nan tiok hari manggunoannyo tantangan caro bamamak.  Pasan ambo, jan mantang-mantang lah bamimpi pakai bahaso Inggris, awak maraso lah labiah arif  pulo daripado urang nan punyo dan hiduik jo bahaso tu.  Katahuilah….ilmuan budaya hanyo tau nan tasirek tapi indak nan tasuruak (raso).  Itulah tampeknyo budayawan Minangkabau, nan mamayungi adaik hujan-paneh, nan mamakaikan adaik tiok hari, nan hiduik jo suasano adaik, sahinggo dipacayo  punyo kearifan untuak manangkok nan tasuruak (taraso), mangumpuaan nan taserak, maasak nan batuka, manyapo nan barubah.

Jadi, wacana deklarasi ko ambo pikia bukanlah barasa dari raso (dado), tapi barangkek dari kiro-kiro (kapalo).  Tapi sungguahpun coitu, poin nan harus diingek, ABS-SBK bukan lah sabuah sistem elektronik nan barisi jaringan-jaringan kabel, ABS-SBK adolah barisi pagangan hiduik masyarakaik Minangkabau nan lahia dari proses panjang, standar karajonyo iyolah ukua-jangko, raso-pareso, sarato alua jo patuik.  Sebagai masyarakaik Minangkabau, talapeh wacana ko baiak ataupun buruak, ambo maraso, KKM 2010 ko samo jo mamak dari rantau nan datang tibo-tibo ingin maatur pagangan hiduik ambo, padahal ambo sandiri ragu apo baliau tau raso bakamanakankan ambo, sabagaimano ambo ndak tau raso bamamak jo baliau nantun.  Mungkinkah ka ambo pataruahkan hiduik ambo untuak mamanuahi kemauan baliau ko? Yang pasti tanggapan ambo, kok ndak nampak cewang ka langik, manga urek tungga nan kadibubuik ulang; mato nan basarok mancaliak sampah di suduik laman, manga pondasi rumah nan ka ditanam ulang?

2.   Pangadoan Limbago Tungku Nan Tigo Sajarangan jo Majelis Adaik jo Syarak

Dalam babarapo kasampatan, ambo pernah badiskusi jo Almarhum Basri Malin Bungsu (Sari Bolai) sarato jo Mak Katik.  Hasilnyo, kami maraso baraso hakikaik Tungku Nan Tigo Sajarangan ataupun Tali Tigo Sapilin adolah samo jo istilah lain, yaitu: Alua Nan Tigo, Rajo Nan Tigo Naiak Nobat ataupun Rajo Nan Tigo Selo.  Nan diistilahkan kato-kato ko iyolah keharmonisan antaro syarak (baco: agamo), adaik (baco: sosio-kultural), jo pamarintahan.  Baitu karangko sacaro teoretisnyo.  Namun, dalam proses palaksanaannyo, nan tadanga iyolah Urang Nan Ampek Jinih, tantunyo di bawah payuang Limbago Adaik (LKAAM, KAN, dll.) di sampiang pamarintahan nagari.  Baliau-baliau ko lah nan batangguang jawab dalam manciptakan kaharmonisan alua nan tigo, sarato manjago suhu tungku nan tigo.  Tujuannyo, nak sapilin tali nan tigo, nak sajarangan tungku nan tigo, nak saselo atau sanobat rajo nan tigo.  Pado akhianyo, tantunyo nak sakaki payuang nan ado, di sinan masyarakaik mangko santoso.

Dari itu pulo, ambo bapandapek baraso pangadoan limbago Tungku Tigo Sajarangan sarato  Majelis Adaik dan Syarak ko, mangabuakan pahaman tantangan hakikaik Tungku Nan Tigo Sajarangan ataupun Tali Tigo Sapilin itu sandiri, dan malumpuahkan fungsi “adaik salingka nagari”.  Lalu dima pulo latak fungsi struktural dan operasional LKAAM, KAN, Urang Nan Ampek Jinih, sarato nan lainnyo? Kadipangaan limbago-limbago ko dek baliau-baliau ko?

3.   Haluan matrilineal

Salah satu kearifan local adaik Minangkabau nan sangaik tanamo iyolah sistem matrilineal. Jikok jadi tarealisasi KKM 2010 ko, apo jadinyo matrilineal?  Asumsinyo, alamaik ka sunsang kalahiran, aia lah mangalia dari hilia.  Aratinyo, haluan adaik tantu turuik bageser, dari darek manjadi dari rantau.  Apokah ka takah itu pulo jadinyo sistem matrilineal?  Salah satu sistem nan paliang unik di muko bumi?  Nan jaleh, kok busua lah baarahan, anak panah tantu manuruik sajo.  Nan ka seso? Tantulah si ruso nan balang kaki, si siti (tanah) nan salalu di bawah. 

Dek sabab karano itu, ambo mamintak, sarancaknyo pulangkanlah puntiang ka hulunyo, babaliaklah ka pituah rang tuo-tuo; “lalok sakalok barasian, langkah salangkah ganjua suruik, suruiknyo ka pangka jalan, pangkanyo adaik jo limbago”.  Manuruik adaik jo limbago, limbago sifaik mananti, jikok alek maisi kandak, kandak nan datang dari pangka.   Itulah limbago nan dituang, itulah titah nan bajunjuang, itulah alua nan baturuik, mako tasabuik alua jo patuik.  Bardasarkan iko pulo ambo batanyo, lah patuikkah alua alek nan banamo KKM ko? Manuruik ambo, alun sajalan alua jo patuik, maa ka bisa dimungkinkan.

B.  Usulan

1.    Etika Alek (acara adaik)

Salah satu ciri caro baradaik dalam acara baradaik di Minangkabau, iyolah pasambahan jo pidato adaik.  Barikuik, pandangan ambo taradok KKM 2010 malalui kacomato pidato jo pasambahan adaik.  Salah satu mamangan pambuka pasambahan nan cukuik tanamo iyolah:

"Tahantak puntiang ka hulu

Di bawah kiliran taji

Asa mulo kato dahulu

Tigo limbago nan tajali

Partamo sambah-manyambah, kaduo baso jo basi,  katigo siriah jo pinang..."

Dari mamangan di ateh, dapek sakironyo dipahami, baraso sabalun karajo ka dikakok, ado hal nan harus diparatian, ikolah satidaknyo nan disirekkan dek ungkapan “asa mulo kato dahulu, tigo limbago nan tajali”.  Dimano, katigo limbago nan tajali ko marupokan langkah bakasinambungan nan indak buliah dipaliang apolagi diungkai.  Khususnyo bagi kito urang nan baradaik Minangkabau, di mano kabaradoan nan iko ko, bisa diumpamokan pulo jo istilah tali tigo sapilin, atau tungku nan tigo sajarangan.  Dalam konteks mamangan ko, nan tigo tu iyolah nan disabuik jo sambah-manyambah (1), baso jo basi (2), sarato siriah jo pinang (3).

Sambah-manyambah maajaan kapado kito tantang duo hal, nan partamo manyaru dan basarah diri kapado Allah, nan kaduo manunjuakkan panghormatan kapado saluruah urang Minangkabau sacaro umum, dan sagalo pihak nan takaik pado khususnyo.  Ruponyo tantu jo baiyo batido ataupun barila-rila jo sagalo pihak nan takaik.  Sadangkan nan kaduo (2), baso jo basi kapado sagalo pihak nan takaik jo parmasalahan nan ka diangkek, dirupoan dalam bantuak manyampaikan nan taraso (wacana) sarato mambana ateh namo diri, niaik sarato mamintak patunjuak.  Tarakhir nan katigo (3) siriah jo pinang, mukasuiknyo iolah manunjuakan kapado masyarakaik baraso payuang alah sakaki, tali nan tigo alah sapilin, alua nan tigo alah sajalan.  Sasudah tu, barulah karajo dikakok, lalu dikatangahkan ka masyarakaik nan jamak, ka labuah nan golong, ka pasa nan rami.

 2.   Lambek Lago Lai ka Manang

Keadaan geografis wilayah Minangkabau nan baragam, tantunyo mambantuak falsafah hiduik sacaro geografis nan babedo pulo.   Tapi samantangpun baitu, sacaro umum bisa dikategorikan kapado duo kalompok: 1) lambek lago lai ka manang, 2) basiang di nan tumbuah.  Falsafah nan partamo banyak dianuik dek masyarakaik Minang nan mahuni daerah darek (hiduik bagantuang ka tani jo ka hutan), samantaro nan kaduo banyak dipakaikan dek masyarakaik Minang nan tingga di daerah saputa pantai (hiduik bagantuang ka lauik).  Namun, sairiang jo pakambangan zaman jo parubahan pola hiduik, pamagang falsafah iko ko pun turuik bakambang.  Wilayah falsafah nan partamo bakambang manjadi rantau, samantaro nan kaduo tatap manjadi caro pandang atau falsafah urang darek.

Sasuai jo eksistensinyo nan barado di darek, mako falsafah “lambek lago lai ka manang” ko bakaitan arek jo tatacaro panyalasaian pamasalahan sosial nan tajadi di tangah-tangah masyarakaik pandukuangnyo.  Ikolah nan tumbuah lalu bakambang sajalan adaik atau UU Luhak jo Lareh.  Sadangkan falsafah “basiang di nan tumbuah”, karano tumbuah dan bakambang di daerah lauik nan sati jo rantau nan batuah, falsafah ko dipati arek jo ajaran Islam (baco: syarak) nan kiramaik.  Jadi, sabananyo, ABS-SBK adolah panyatuan dari kaduo hakikaik falsafah ko.  Walau fisiknyo taraso basalisiah, namun hakikaiknyo adolah samo.  Jikok dalam Islam, hukum halal manahan bandiang dipati dek hukum thoyyib, di dalam adaik, hukum alua manahan patuik dipati dek hukum mungkin.  Intinyo, jaan mamahami ABS-SBK dalam karangko akidah, tapi pahamilah dalam karangko muamalah.  Karano itu pulo, ujuang dari ABS-SBK adolah K (kitabullah) bukan A (al-Quran).

Lalu manga ambo katangahkan subjudul “lambek lago lai ka manang”? Karano pado palaksanaanyo, baik hukum adaik maupun hukum syarak dalam kaidah muamalah manghandaki panyalasaian damai, dalam pangartian untuak manciptakan kasejahteraan basamo.  Hal iko tantu mambutuahkan wakatu nan lamo, manyito tanago jo pikiran nan banyak, indak instan bak cando mie.  Dek sabab mangko baitu, nabi dibari kiramaik dalam badakwah, panghulu dibari tuah dalam bamuamalah.  Bia lambek asa salamaik, bak mamakan bubua nan angek.  Caro sosialnyo, tarimo, badamai, kaluakan potensi, tuah kan datang sandirinyo, urang banyak akan manuruik sajo.  Indakkah coitu nabi badakwah? Indak koh coitu pangulu bapituah: mancaliak contoh ka nan sudah, mancaliak tuah ka nan manang, badakwah jo kataladanan, bamuamalah bukan jo pamaksaan.   

Tarakhir, sabalum ujuang kato buah rundingan ambo katangahkan, takana pulo ambo jo pituah rang tuo-tuo “sapanjang tubuah bayang-bayang, sawajah rupo jo pangkaiknyo”.  Kalau kito terjemahkan ka dalam caro agamo, tasabuiklah kato “kullu syaiin lahu maqamun”, atau sederhananyo urang modern alah baparingek, bunyinyo kiro-kiro coiko “bekerjalah sesuai dengan tempat dan kapasitas profesionalmu masing-masing”.  Namun, dek nasi lah jadi bubua, pulang ka bareh tantu nyo lah sagan, elok kito piliah nan taserak, kito japuik nan tatingga, kito kumbalikan pusako ka enggeran, tantunyo jo karilaan dan kasadaran.

Kasimpulan ambo, umpamo urang nio mangaji; niakkanlah untuak baibadah, kanakkan busana muslim.  Jikok nio mangatangahkan wacana nan ateh namo Minangkabau, mako talabiah dahulu niaikkanlah untuak baradaik, dan kanakkan pakaian baradaik.  Pendek kato, laluilah langkah nan baradaik.  Untuak mangatahui langkah baradaik nantun, kanakkanlah pulo pituah lamo: badeta hitam batatak, bacawek salilik pinggang, baserong si bugih lamo – nan lai tampek mamintak, nan kayo tampek batenggang, nan tuo tampek batanyo.  Banyak-banyaklah mamintak, batenggang, sarato batanyo, atau bakolaborasi caro kininyo.

Akhianyo, sungguahpun indak manih saroman tabu, mudah-mudahan lai indak tibarau sajo kasadonyo.  Kok lai ado nan boneh, tolonglah naikkan ka ateh rangkiang, kok ampo sansai sajo nan tasuo, campakanlah ka sarok laman.  Di balakang ambo baharok, kok indak ka jadi pamenan dek Sutan-Sutan, atau jadi pahangek lalok dek si Buyuang, bialah jadi rasaki ayam.  Jo salam ambo akhiri pasambahan, assalamu alaikum wa rahmatullahi wa barakatuh.

Kalilawa di pulau rambang

Anak ruso mati badabiah

Kok gawa tolong ditimbang

Kok doso ampun nan labiah